Tre vendet nordike shpërndajnë broshura për qytetarët se si t’i mbijetojnë luftës

Të hënën, miliona suedezë do të fillojnë të marrin kopje të një broshure që këshillon popullatën se si të përgatitet dhe të përballet në rast lufte ose krizash të tjera të papritura, shkruan BBC.

“Nëse vjen kriza ose lufta” është përditësuar nga gjashtë vjet më parë për shkak të asaj që qeveria në Stokholm e quan situatën e përkeqësuar të sigurisë, me të cilën nënkupton pushtimin e plotë të Ukrainës nga Rusia. Broshura është gjithashtu dy herë më e madhe.

Finlanda fqinje sapo ka publikuar këshillat e saj të reja në internet për “përgatitjen për incidente dhe kriza”.

Dhe norvegjezët gjithashtu kanë marrë kohët e fundit një broshurë që u kërkon atyre të përgatiten për të menaxhuar vetë për një javë në rast të motit ekstrem, luftës dhe kërcënimeve të tjera.

Gjatë verës, agjencia e menaxhimit të emergjencave të Danimarkës tha se po u dërgonte me email të rriturve danezë detaje mbi ujin, ushqimin dhe ilaçet që do t’u duheshin për të kaluar një krizë për tre ditë.

Në një seksion të detajuar mbi konfliktin ushtarak, broshura digjitale finlandeze shpjegon se si qeveria dhe presidenti do të përgjigjeshin në rast të një sulmi të armatosur, duke theksuar se autoritetet e Finlandës janë “të përgatitura mirë për vetëmbrojtje”.

Suedia iu bashkua NATO-s këtë vit, duke vendosur si Finlanda të aplikojë pasi Moska zgjeroi luftën e saj në 2022. Norvegjia ishte një anëtare themeluese e aleancës mbrojtëse perëndimore.

Ndryshe nga Suedia dhe Norvegjia, qeveria e Helsinkit ka vendosur të mos printojë një kopje të broshurës për çdo shtëpi, pasi “do të kushtonte miliona” dhe një version digjital mund të përditësohej më lehtë.

“Ne kemi dërguar 2.2 milionë kopje letre, një për çdo familje në Norvegji”, tha Tore Kamfjord, i cili është përgjegjës për fushatën e vetë-përgatitjes në Drejtorinë norvegjeze për Mbrojtjen Civile (DSB).

Të përfshira në listat e artikujve që duhen mbajtur në shtëpi janë ushqime me jetëgjatësi, si fasule, makarona, si dhe ilaçe, duke përfshirë tabletat e jodit në rast të një aksidenti bërthamor.

Rruga Press