Thirrje urgjente për rezervistët danezë: Situatë e jashtëzakonshme në Kopenhagë

Forcat e Armatosura të Danimarkës kanë thirrur urgjentisht rezervistët për shërbim, në përgjigje të një kërcënimi në rritje nga dronët në hapësirën ajrore të vendit. Lajmi u bë publik nga televizioni danez TV 2, duke e cilësuar si një masë të rrallë dhe të jashtëzakonshme.

Eksperti i sigurisë Jacob Kaarsbo, ish-analist kryesor në Shërbimin e Inteligjencës Ushtarake të Danimarkës, tha se thirrje të tilla bëhen shumë rrallë dhe tregojnë se vendi po përballet me një situatë krejtësisht të jashtëzakonshme. Ai shtoi se janë marrë masa që nuk janë përdorur më parë.

Sipas TV 2, qëllimi i mobilizimit është përgatitja e rezervistëve për një operacion të mundshëm në territorin danez. Vendimi, sipas raportimeve, mund të lidhet edhe me samitin e ardhshëm të Bashkimit Europian që do të mbahet këtë javë në Kopenhagë.

Ministria e Mbrojtjes së Danimarkës refuzoi të komentojë mbi zhvillimet, duke ia kaluar përgjegjësinë Komandës së Forcave të Armatosura, e cila gjithashtu nuk iu përgjigj pyetjeve të mediave.

Kryetari i Organizatës së Personelit të Rezervës në Danimarkë, Jesper Schneider, nuk pranoi të tregojë se kur është bërë thirrja e fundit urgjente për rezervistët. Megjithatë, ai theksoi se rezervistët thirren rregullisht për stërvitje dhe detyra operacionale, dhe se situata aktuale tregon rëndësinë e të pasurit një rezervë të përgatitur mirë.

Rruga Press