Thirrje ndërkombëtare për armëpushim në Gaza mes frikës për zgjerim të luftës

Presidenti i Shteteve të Bashkuara të Amerikës, Joe Biden, ka thënë se është “shumë i shqetësuar” që dhuna në Lindjen e Mesme mund të përshkallëzojë, duke shtuar se vrasje e liderit të Hamasit në Iran “nuk i ka ndihmuar” përpjekjet për të negociuar armëpushimin e luftës Izrael-Hamas.

Bideni ka thënë se ka pasur bisedë “shumë direkte” me kryeministrin e Izraelit, Benjamin Netanyahu, të enjten.

“E kemi bazën për një armëpushim. Ai duhet të lëvizë drejt tij dhe ata duhet të lëvizin drejt tij tani”.

Netanyahu ka theksuar se shteti i tij është i vendosur të arrijë “fitore të plotë” kundër Hamasit. Ai ka shtuar se Izraeli shpreson për një armëpushim dhe se po punon për një të tillë, raportoi AP.

Vrasjet e liderit të Hamasit, Ismail Haniyeh, dhe komandantit të Hezbollahut, Fouad Shukur, në Bejrut, rrezikojnë përshkallëzimin e luftimeve në një luftë rajonale, me Iranin që po kërcënon të përgjigjet pas sulmit në territorin e tij. Izraeli është zotuar t’i vrasë liderët e Hamasit pas sulmit të 7 tetorit që nxiti luftën në Gaza.

Sekretari amerikan, Antony Blinken, është një prej zërave të ngritur ndërkombëtarisht për armëpushim gjatë ditëve të fundit, duke thënë se është e vetmja mënyrë për të thyer ciklin e dhunës dhe vuajtjes.

Rruga Press