Sveçla: As që bëhet fjalë të plotësohet kërkesa e Vuçiqit për kthimin e ish-policëve në veri
Ministri i Punëve të Brendshme, Xhelal Sveçla, ka thënë se nuk bëhet fjalë që të plotësohet kërkesa e presidentit të Serbisë, Aleksandar Vuçiq, që ish-policët e dorëhequr në veri, të rikthehen sërish në punë.
Të dielën në Këshillin e Përgjithshëm të Lëvizjes Vetëvendosje, Sveçla ka thënë se kjo do të ishte shkelje e Kushtetutës së Kosovës.
Dorëheqjen e një mase të policëve nga komuniteti serb, Sveçla e ka quajtur pastrim të elementit kriminal në veri.
“Dorëheqja e këtyre zyrtarëve policorë, në fakt ka qenë po ashtu për një masë të madhe të tyre, pastrim i elementit kriminal në atë zonë. As që bëhet fjalë që të plotësohet kërkesa e Aleksandar Vuçiqit që ish-policët të kthehen në radhët e Policisë së Kosovës. Kjo jo vetëm se është shkelje ligjore, por është edhe shkelje e vullnetit politik të qytetarëve të Republikës së Kosovës”, ka thënë ai.
Derisa ka folur për punët që janë kryer gjatë qeverisjes së LVV-së, Sveçla ka përmendur edhe rastet e ngritura për krim të organizuar, terrorizëm e krim ekonomik dhe korrupsion, duke thënë se për shtatë vjet para qeverisjes Kurti, nuk është ngritur asnjë nga këto vepra penale.
“Nga viti 2014 deri më 2021, ne nga Policia e Kosovës e atëhershme në atë zonë, kemi pasur 0 raste të ngritura për krimin e organizuar, kemi pasur 0 raste të ngritura për terrorizmin, kemi pasur 0 raste të krimit ekonomik e korrupsionit. Për shkak të marrëveshjeve të mëhershme ku në kuadër të Policisë së Kosovës janë integruar ekstremistë e banditë të ndryshëm, të cilët gjithçka kanë pasur të Kosovës ka qenë uniforma, arma, autorizimet policore, por edhe pagat, kurse në plotni i kanë shërbyer Beogradit”, ka thënë ai.
Aktakuzën për rastin “Banjska”, Sveçla e konsideroi të mangët pasi sipas tij, nuk i përfshin edhe disa zyrtarë serbë si komandantin e ushtrisë dhe zv.komandantin.
Përgjatë fjalimit në Këshill të Përgjithshëm, Sveçla tha se nuk do të kthehet qeverisja e pushteteve të kaluara, duke përmendur se “do të kemi qeverisjen Kurti 3”.
“Bashkëpunimi do të jetë i pakushtëzuar, e për dallim të qeverive të kaluara ,duhet të vazhdojë të thellohet edhe më shumë”, ka shtuar ministri i Punëve të Brendshme.
Rruga Press