Sulstarova: Gjykata Supreme e republikës certifikon për zgjedhje politike subjektin që nuk e njeh republikën!

Profesori Enis Sulstarova ka reaguar pas vendimit të Gjykatës Supreme për të certifikuar për zgjedhje subjektin politik që, sipas tij, nuk e njeh Republikën e Kosovës.

“Gjykata Supreme e Republikës certifikon për zgjedhje politike subjektin që nuk e njeh Republikën! Në çdo demokraci, elektoratit i ofrohen mundësi zgjedhjeje që janë brenda rendit kushtetues, jo që nuk e mohojnë ekzistencën e shtetit dhe nuk angazhohen me mjete të dhunshme për ta shkatërruar atë”, shkroi Sulstarova.

Ai theksoi se në vende të tjera mund të ketë parti de facto separatiste, por që de jure e njohin shtetin. Ndërkohë, sipas tij, kur zbulohet se një parti është vegël e një shteti armik ose e përfshirë në terrorizëm, ajo nxirret jashtë ligjit.

Sulstarova shtoi se elektorati serb në Kosovë duhet të orientohet të votojë për parti që përkrahin Republikën e Kosovës, e jo për Listën Serbe, e cila sipas tij mban gjallë separatizmin dhe agjenturën e Serbisë brenda shtetit.

“Në fund, Gjykata Supreme me vendimin e saj ka goditur vetë Republikën në emër të së cilës i jep vendimet”, theksoi ai.

Rruga Press