Stuhia e rrallë e borës paralizon Stambollin e Athinën

Aeroporti më i ngarkuar i Evropës u mbyll në Stamboll të hënën, ndërsa shkollat dhe qendrat e vaksinimit u mbyllën në Athinë, pasi një stuhi e rrallë dëbore mbuloi një pjesë të Mesdheut Lindor, duke shkaktuar ndërprerje dhe kaos në trafik.

Mbyllja e aeroportit të Stambollit, ku çatia e një prej terminaleve të mallrave u shemb nën dëborë të madhe, duke mos shkaktuar lëndime, ndaloi fluturimet që shtriheshin nga Lindja e Mesme dhe Afrika në Evropë dhe Azi, raporton “The Guardian”.

Zyrtarët e udhëtimit i thanë AFP-së se ky rast shënoi mbylljen e parë të aeroportit që kur i njëjti zëvendësoi aeroportin e vjetër “Ataturk” të Stambollit si qendër e re për “Turkish Airlines” në 2019.

Bora e parë e dimrit rezultoi me kokëdhimbje të madhe për 16 milionë banorët e qytetit më të madh të Turqisë, ku makinat u përplasën me njëra-tjetrën, duke rrëshqitur në rrugë të pjerrëta, të mbuluara me akull dhe me autostrada të kthyera në parkingje.

Zyra e guvernatorit të Stambollit paralajmëroi shoferët se nuk do të mundë të hynin në qytet nga Trakia – një rajon që shtrihet në pjesën evropiane të Turqisë deri në kufirin e saj perëndimor me Bullgarinë dhe Greqinë.

Qendrat tregtare u mbyllën herët, shërbimet e shpërndarjes së ushqimit u mbyllën dhe tezgat ikonike të qytetit me “simite” qëndruan bosh sepse furnitorët nuk mund të kalonin borën.

Stuhia bllokoi rrugët në të gjithë Turqinë Qendrore dhe Juglindore përpara se të kalonte në Sirinë fqinje, ku e shtoi edhe më shumë mjerimin në kampet veriore të refugjatëve të vendit të ikur nga lufta.

Aeroporti i Stambollit shërbeu më shumë se 37 milionë pasagjerë vitin e kaluar, duke u bërë një nga qendrat ajrore më të rëndësishme në botë.

Por kritikët e presidentit Recep Tayyip Erdogan kishin vënë në pikëpyetje prej kohësh vendimin e tij për të vendosur aeroportin në një zonë të largët përgjatë bregut të Detit të Zi, që shpesh mbulohet me mjegull në dimër.

“Për shkak të kushteve të pafavorshme, të gjitha fluturimet janë ndalur përkohësisht për sigurinë ajrore”, tha aeroporti në një deklaratë, duke postuar foto në Twitter të borës së verdhë që rrotullohej rreth aeroplanëve të bllokuar.

Shumica e institucioneve kryesore të Turqisë qëndruan të hapura.

Por në Greqi, ku temperaturat gjatë natës ranë në minus 14 gradë Celsius, stuhia pezulloi një seancë të parlamentit dhe detyroi shkollat dhe qendrat e vaksinimit të mbyllen në Athinë.

Qindra shoferë u bllokuan në makina rreth kryeqytetit – shumë prej tyre duke shfryrë zemërimin e tyre në stacionet televizive – pavarësisht përpjekjeve të policisë për të mbyllur pikat hyrëse të autostradës në veri të qytetit.

“Gruaja ime nuk ka asgjë për të ngrënë që nga mëngjesi. Kishim një shishe të vogël me ujë mes nesh”, tha një shofer që e identifikoi veten vetëm si Christos për televizionin privat “Star TV”. “Gjithçka është e ngrirë”.

Ushtria, zjarrfikësit dhe policia nisën punën për lirimin e shoferëve të bllokuar në orët e para të mbrëmjes.

Ministri i krizës klimatike dhe mbrojtjes civile të Greqisë, Christos Stylianides, kërkoi falje për kaosin dhe fajësoi kompaninë që menaxhonte autostradën për mosmbajtjen e saj të hapur.

Një stuhi e ftohtë me temperatura nën zero dhe erëra të forta goditi Athinën për herë të fundit në shkurt 2021, duke lënë të vdekur katër persona në ishujt Evia dhe Kretë dhe duke lënë dhjetëra mijëra familje pa energji elektrike për ditë të tëra.

Kostas Lagouvardos, drejtor i kërkimit në Observatorin Kombëtar të Athinës, tha për TV ANT1 se kryeqyteti nuk kishte parë dimra të njëpasnjëshëm si ky që nga viti 1968. 

Rruga Press