“Strehë për kriminelët!”, këshilltari i Zelenskyt bën thirrjen: Rusisë t’i hiqet e drejta e vetos në OKB, po bën pazare

“Rusia përdor të drejtën e vetos në OKB për të ndihmuar regjimet “të prirura për krime lufte. Është koha për t’i hequr Rusisë të drejtën e vetos dhe për ta përjashtuar atë nga Këshilli i Sigurimit i OKB-së”.

Kështu ka shkruar në Twitter këshilltari presidencial i Ukrainës, Mykhailo Podolyak. Ai shtoi mes të tjerash se Rusia është kthyer në mbrojtëse të terroristëve dhe kriminelëve të luftës, në mbarë botën.

“Rusia e Putinit jo vetëm që është bërë mbrojtëse e grupeve terroriste dhe kriminelëve të luftës në mbarë botën, por gjithashtu vazhdon të helmojë organizatat ndërkombëtare.

Tashmë është e qartë: Kremlini e ka kthyer të drejtën e vetos Këshillit të Sigurimit të OKB-së në një pazar për vende me regjime të veçanta dhe një prirje patologjike për krime lufte.

Kushdo që dëshiron të kryejë një sulm terrorist, blen teknologji raketore duke anashkaluar sanksionet… ai e di se mund të gjejë mbështetje në Rusi dhe se çdo reagim nga OKB-ja do të bllokohet.

Siguria globale duhet të pastrohet. Hapi i parë është shumë i vonuar: është koha që përfundimisht t’i hiqet Rusia nga fuqia e vetos dhe ta përjashtojmë atë nga Këshilli i Sigurimit”, tha Podolyak.

Rruga Press