Situata alarmante/ Një minë COVID-i me sahat, Real Madridi tani ka 11 të infektuar
Reali i Madridit do të luajë ndeshjen e fun dit të vitit në San Mames ndaj Atletikos së Bilbaos. Një ndeshje që vjen në momentin më të papërshtatshëm për klubin madrilen. Numri i të infektuarve në skuadër ka shkuar në 11.
I fundit që iu bashkua listës është David Alaba, i cili ditën e djeshme rezultoi pozitiv në testin PCR, duke humbur sfidën e radhës. Përveç austriakut, lojtarët e tjerë që do të mungojnë janë Luka Modriç, i cili edhe pse ka një tampon negativ, është lënë jashtë listës.
Ndërkohë, Marselo, Asensio, Rodrigo, Bale dhe Lunin nuk do të jenë, shto këtu dhe Iskon, që pas simptomave të shfaqura të hënën, rezultoi pozitiv. Trajneri Karlo Ançeloti tha në konferencën për shtyp se Modriç është duke vuajtur ende pasojat e virusit dhe nuk është gati për ndeshjen, edhe pse është negativ.
Mungesa të sigurta, edhe pse jo për shkak të Covid, do të jenë dhe ato të Dani Sebalos dhe Karvahal, të cilët nuk janë ende gati. Ndërkohë që do të jetë një mundësi e mirë për Kamavingën për të zënë një vend në mesfushë pas pezullimit për shkak kartonësh të Kasemiros. Ndërkohë që Militao do të jetë në krah të Naços që do të zëvendësojë Alaban.
Duke parë këtë “plagë” që ka mbuluar skuadrën madrilene, trajneri Karlo Ançeloti është detyruar të kthejë kokën nga akademia. Toni Fuidias dhe Piniero nga skuadra B do të jenë në listën e të grumbulluarve. Mes tyre edhe Miguel, Rafa Marin, Blanko, Arribas dhe Peter.
Do të ishte me të vërtetë një mrekulli nëse Reali do të dilte me tri pikë nga sfida e sotme në Bilbao duke parë mungesat e shumta të skuadrës së “Los Blancos”. Ançeloti tha para ndeshjes ndaj baskëve:
“Situata në klubin tonë nuk ka nevojë për koment, por është diçka që duhet ta kalojmë dhe mendoj që kemi shanse për të dalë nga ndeshja e nesërme (sotme) me fitore. Ndryshimi i skemës? Po e mendoj diçka të tillë duke parë situatën ku ndodhemi. Nuk është e lehtë. Bilbao është një skuadër e fortë fizikisht që në fushën e saj kërkon të bëjë gjithmonë mirë.
Pres një atmosferë të zjarrtë në stadium. Shpresoj që të dalim me tri pikë, do të ishte shumë e rëndësishme për ecurinë tonë që deri tani ka qenë pozitive edhe pse barazuam në ndeshjen e fundit ndaj Kadiz”, tha trajneri Italian.
Rruga Press