Sirianët akuzojnë Perëndimin se ata nuk po ndihmohen njësoj në fatkeqësinë e tërmetit

Një këshilltare e presidentit sirian ka akuzuar Perëndimin se po luan politikë kur bëhet fjalë për t’i ofruar Sirisë ndihma humanitare pas tërmetit të së hënës.

Duke folur në BBC, Bouthaina Shaaban bëri thirrje që BE-ja dhe SHBA-ja të heqin sanksionet, duke thënë se sirianët jashtë vendit nuk ishin në gjendje të dërgonin para për të ndihmuar të prekurit nga fatkeqësia.

Shaaban akuzoi Perëndimin se dëshironte vetëm t’i dërgonte ndihma organizatës së Helmetave të Bardha – grupi vullnetar që vepron në zonat e kontrolluara nga opozita siriane – për të cilin Siria pretendon se është një “grup terrorist”.

Më herët, presidenti amerikan Joe Biden tha se ndihmat po shpërndaheshin në të gjitha zonat, pavarësisht se kush e kontrollon territorin. Zyrtarët e BE-së kanë këmbëngulur gjithashtu se sanksionet e bllokut kundër autoriteteve siriane nuk po ndikojnë në potencialin e tij për të ndihmuar.

Kur u pyet nëse qeveria siriane kishte qenë duke koordinuar me qeverinë turke, Shaaban tha se nuk e kishin bërë.

Shaaban pretendoi se kombet e tjera po e trajtonin vendin e saj ndryshe nga Turqia, duke pyetur: “Pse [kombet perëndimore] nuk i trajtojnë njerëzit në të njëjtën mënyrë?”

Ajo shtoi: “Nuk është humanizëm, është politikë. Ne jemi të sigurt për këtë tani”.

Rruga Press