Sindikata e Policisë dënon dezinformatat e Branislav Kërstiq për heroin Afrim Bunjaku

Sindikata e Policisë së Kosovës, me shqetësim të vazhdueshëm, ka ndjekur praktikat e fundit të raportimit mediatik dhe publik në lidhje me pjesëtarët e Policisë së Kosovës, sidomos në raste tragjike ose incidente që janë ende nën hetim.

Duke pasur parasysh ndjeshmërinë dhe rëndësinë e ruajtjes së dinjitetit të zyrtarëve të rendit, ndjejmë obligim të reagojmë me përgjegjësi dhe maturi.

Në reagim përmendet rastin e rreshterit Afrim Bunjaku, i vrarë më 24 shtator 2023 gjatë një sulmi terrorist në Banjska.

“Deklarimi i fundit në një medium publik të vendit nga gazetari Branislav Krstiç, që mohon rënien e heroit, është i papranueshëm dhe përbën fyerje të rëndë ndaj kujtimit të tij dhe ndaj sakrificës së heroit, rreshterit Afrim Bunjaku”.

Sindikata e Policisë përmend edhe rastin e vrasjes së rreshterit Muhamet Lika në Kaçanik, duke theksuar se tentativa e fundit për ta përfshirë në teori konspirative rreth vrasjes së tij përbën përpjekje të papranueshme për devijimin e hetimeve dhe njollosjen e figurës së tij dhe të institucionit që ai i shërbeu me nder.

Një tjetër shqetësim serioz, Sindikata e Policisë së Kosovës përmend publikimin e menjëhershëm në media dhe rrjete sociale të emrave dhe fotografive të pjesëtarëve të policisë të përfshirë në ndonjë rast, ndërkohë që proceset hetimore nuk kanë përfunduar.

Sindikata kërkon që, nëse ndonjë zyrtar shfaqet në media pa të drejtë dhe më pas shpallet i pafajshëm, të bëhet demant publik dhe korrekt, me të njëjtin intensitet me të cilin është dhënë lajmi fillestar.

Sindikata e Policisë së Kosovës thotë se mbetet e përkushtuar në mbrojtjen e integritetit dhe dinjitetit të çdo pjesëtari të saj, duke thënë se mbeten të hapur për bashkëpunim me të gjitha mediat që veprojnë me profesionalizëm dhe objektivitet.

Rruga Press