Si të vazhdohet me gjykimin në mungesë kundër Radoiçiqit

Aktakuza e ngritur nga Prokuroria Speciale e Kosovës kundër Milan Radoiçiqit dhe 41 individëve të tjerë mbetet e ngecur, pa një afat kohor të qartë për fillimin e gjykimit. Avokatët sugjerojnë se Prokurorisë Speciale mund t’i duhet të ndryshojë aktakuzën për të mundësuar vazhdimin e gjykimit në mungesë.

Kanë kaluar më shumë se katër muaj nga ngritja e aktakuzës për sulmin terrorist në Banjskë të Zveçanit, ku u përfshi Radoiçiq dhe 44 të tjerë. Përderisa gjykimi ka filluar për tre të pandehur, procesi për 42 personat e mbetur, përfshirë Radoiçiqin, ende nuk ka ecur përpara, pasi ata mbeten të paarritshëm nga sistemi i drejtësisë së Kosovës.

Arianit Koci, avokati që përfaqëson familjen e policit të vrarë në sulm, theksoi se ky rast duhet të ketë prioritet:

“Kjo është një çështje e një rëndësie të veçantë. Rendi kushtetues i Kosovës ishte i rrezikuar, prandaj besoj se duhet t’i jepet prioritet trajtimit të këtij rasti dhe fillimit të gjykimit. Unë jam i përgatitur për të dy skenarët, qoftë gjykim në mungesë apo mekanizma të tjerë ligjorë”, tha Koci për TV Dukagjini.

Naim Rudari, avokati që përfaqëson njërin prej policëve të lënduar më 24 shtator, deklaroi se Prokuroria Speciale mund ta zgjidhë këtë çështje nëse gjykata kërkon ndryshime në aktakuzë:

“Gjykata mund të fillojë lehtësisht gjykimin në mungesë, ose në mënyrë alternative, të kërkojë nga prokuroria ndryshimin e aktakuzës. Një ndryshim i vogël, kozmetik i aktakuzës do të mjaftonte për të lejuar që gjykimi të fillojë pa vonesa të mëtejshme”, tha Rudari.

Zyra e Prokurorit Special ende nuk ka komentuar nëse aktakuza kundër Milan Radoiçiq dhe të tjerëve mund të modifikohet për të lehtësuar gjykimin në mungesë.

Rruga Press