Shteti që denoncon “operacionet psikologjike” të Rusisë

Moldavia ka mohuar këtë të premte se Forcat e Armatosura të Ukrainës përbëjnë një “kërcënim” për rajonin separatist dhe pro-rus të Transnistrisë, në Moldavi. Rusia këtë javë akuzoi Kievin për përgatitjen e një sulmi me “flamur të rremë”, pretendime që “nuk korrespondojnë me të vërtetën”, sipas Ministrisë së Jashtme moldave.

Ministria ka theksuar se situata e sigurisë në rajon është “e qëndrueshme”, në të njëjtën kohë që kanë siguruar se deklaratat ruse janë “të pabaza” dhe se objektivi i tyre është “manipulimi i opinionit publik”.

“Ne përsërisim qëndrimin e autoriteteve moldave në lidhje me zgjidhjen ekskluzivisht paqësore të konfliktit Transnistrian mbi bazën e sovranitetit dhe integritetit territorial të Republikës së Moldavisë brenda kufijve të njohur ndërkombëtarisht”, thotë Ministria e Jashtme e Moldavisë.

Sipas Sekretarit moldav të Shtetit, Valeriu Mija, pretendimet ruse nuk janë gjë tjetër veçse “operacione psikologjike”, pjesë e luftës: “Ministria e Mbrojtjes beson se është një element i një operacioni psikologjik dhe jo një plan real”.

Në këtë drejtim ka folur edhe Presidentja moldave, Maia Sandu, e cila i ka përshkruar deklaratat ruse si “dezinformim agresiv”: “Disa donin që vendi ynë të rrëzohej dhe të instalonte një qeveri kukull në Kishinau, të skllavëruar ndaj interesave të Kremlinit”.

Çfarë është Transnistria?

Rajoni i Transnistrisë (popullsia e të cilit është kryesisht rusë dhe ukrainas) ka fituar rëndësi për shkak të lidhjes së tij me qeverinë ruse dhe pozicionit të tij të rëndësishëm gjeostrategjik. Autoritetet ukrainase kanë denoncuar madje edhe inkursione të mundshme ruse në Ukrainën perëndimore nga Transnistria, ndërsa autoritetet e rajonit separatist kanë kërkuar që pavarësia e tyre të njihet në mënyrë “paqësore”.

Vetëm pak ditë më parë, qeveria e re moldave, e udhëhequr nga kryeministri Dorin Recean, i bëri thirrje Rusisë të tërheqë forcat dhe armët e saj të dislokuara nga Transnistria. Ndërsa ishte ende ministër i Brendshëm, Recean njoftoi se objektivi i tij ishte “çmilitarizimi i Transnistrisë” dhe tërheqja e ushtrisë ruse nga territori, ai ka riafirmuar angazhimin e tij për “një zgjidhje paqësore të konfliktit” në zonë.

“Kjo do të thotë se Rusia duhet të evakuojë armët dhe pajisjet. Është e rëndësishme që Rusia të përmbushë angazhimin e saj dhe kjo nënkupton çmilitarizimin, tërheqjen e armëve dhe ushtarëve që ndodhen ilegalisht në territorin moldav”, tha Recean të martën në një konferencë për shtyp.

Rruga Press