Shteti duhet të ndërhyjë për rritjen e çmimeve të produkteve, thonë ekonomistët

“Shteti mund dhe duhet të ndërhyjë me mjetet e nevojshme nëse rriten çmimet e shportës bazë”. Kështu kanë deklaruar për emisionin “Mirëmëngjes” në Euronews Albania ekspertët e ekonomisë nga Shqipëria, Kosova dhe Maqedonia e Veriut.

Ekonomisti në Shqipëri, Klodian Muço tha se qeveria shqiptare mund dhe duhet të kishte frenuar rritjen e çmimeve.

“Në një situatë krize kërkohet edhe ndërhyrja e shtetit. Shqipëria konsiderohet vendi i parë në Ballkanin Perëndimor me 7% të shqiptarëve që janë në krizë urie. Në tilla kushte nevojitet edhe ndërhyrja e shtetit”, u shpreh ai.

I të njëjtit mendim është edhe Bardh Ahmeti, ekspert ekonomie në Kosovë, i cili nënvizoi se në këtë shtet qytetarët po vuajnë rritjen e çmimeve.

“Jemi të prekur nga inflacioni, po vuajmë krizën e çmimeve. Ne jemi shumë të varur nga importet. Në rrethana të tilla duhet të ketë ndërhyrje të shtetit, kur preket shporta e konsumatorit në këtë masë”, tha ai.

Ndërsa, ekonomisti nga RMV Harun Tahiri, e quajti një vendim të mirë por të vonuar vendimin e qeverisë atje për të ngrirë çmimet e shportës bazë. Ai theksoi se është me rëndësi ndërjyrja e shtetit në momente krize.

Qeveria në Maqedoninë e Veriut ka vendosur ngrirjen e çmimeve të produkteve bazë në tregtinë me shumicë dhe pakicë. Çmimet e produkteve do të mbeten aq sa kanë qenë më datë 1 dhjetor të këtij viti, si në tregtinë me shumicë ashtu edhe në atë me pakicë.

Ky vendim do të zbatohet deri më 31 janar 2022 dhe më pas do të rishikohet mundësia e zgjatjes se këtij afati nëse situata e tregut e kërkon diçka të tillë. /euronews/

Rruga Press