Shtetet e Baltikut protestuan ndaj komenteve të Macronit për sigurinë e Rusisë
Estonia, Letonia dhe Lituania, së bashku me një numër vendesh të tjera të Evropës Lindore, kanë shprehur pakënaqësinë e tyre me fjalët e presidentit francez, Emmanuel Macron, sipas të cilave Rusisë duhet t’i ofrohen garancitë e sigurisë pas luftës.
Presidenti Macron tha në një intervistë të 3 dhjetorit me rrjetin televiziv francez TF1 se Evropa duhet të përgatitet për arkitekturën e saj të ardhshme të sigurisë dhe të peshojë se si t’i japë Rusisë garanci sigurie pasi të kthehet në tryezën e bisedimeve. “Kjo do të thotë se një nga pikat thelbësore që duhet të adresojmë – siç ka thënë gjithmonë presidenti Putin – është frika se NATO do të vijë deri në dyert e saj dhe vendosja e armëve që mund të kërcënojnë Rusinë”, tha Macroni.
Sipas Reuters, Ukraina dhe vendet baltike shprehën pakënaqësinë e tyre menjëherë pas komenteve, me administratën franceze dhe ministrinë e jashtme që nxituan për të zbutur tensionet.
Agjencia e lajmeve raporton se Çekia u dërgoi vendeve anëtare një draft demarsh ku thuhej se nismat e mëparshme të Rusisë në drejtim të arkitekturës së sigurisë kanë pasur për qëllim ndarjen dhe dobësimin e Evropës. Dokumenti renditi zhvillime të ndryshme në marrëdhëniet e ndërsjella të sigurisë, duke filluar me dokumentin bazë të marrëdhënieve NATO-Rusi të vitit 1997 dhe duke përfunduar me kërkesat e Moskës përpara se të sulmonte Ukrainën në vitin 2021.
Informacioni i Reuters sugjeron se Çekia, së cilës iu bashkuan përfaqësues të disa shteteve të tjera anëtare, ia dorëzoi të hënën dokumentin drejtorit të departamentit të Evropës kontinentale të Ministrisë Franceze të Evropës dhe Punëve të Jashtme .
Përfaqësuesit e Estonisë nuk kanë kritikuar publikisht komentet e Macronit. Kur u kërkua, kryeministrja Kaja Kallas tha se ajo do të diskutojë për organizatën e sigurisë evropiane kur të takohet personalisht me Macronin, megjithatë duke shtuar se është e rrezikshme të flasësh për paqen me Rusinë përpara se forcat ruse të dëbohen nga Ukraina dhe të garantohet siguria e saj.
Rruga Press