Shqipëria më e shtrenjtë se vendet e BE-së. Veza, djathi e qumështi, me çmimin më të shtrenjtë në treg
Qytetarët shqiptar po blejnë produktet ushqimore më shtrenjtë se vendet e Bashkimit Europian. Të dhënat e fundit të Eurostat tregojnë se shqiptarët blejnë më shtrenjtë vezën, qumështin dhe djathin, por jo më pak edhe produktet e tjera të shportës. Sipas këtij raporti, blegtori e bujqësi në vendin tonë po shkon në pikiatë për shkak të mungesë së subvencioneve dhe mungesë së fuqisë punëtore nga emigrimi masiv.
Shqipëria po përballet me një paradoks, ku çmimet e ushqimeve për herë të parë në histori e tejkaluan mesataren e Bashkimit Europian, por ndërkohë vendi ka peshën më të lartë të bujqësisë në të gjithë Europën.
Të dhënat e Eurostat treguan se për herë të parë që nga viti 2005, kur njësia europiane e statistikave mat të dhënat, indeksi i Çmimeve të Ushqimeve dhe Pijeve jo Alkoolike për Shqipërinë e ka kaluar nivelin 100% duke shkuar në 100.1%.
Kjo do të thotë se çmimet e ushqimeve në Shqipëri janë 1% më të shtrenjta se mesatarja e Bashkimit Europian, në një kohë që fuqia blerëse është sa 41% e mesatares së BE-së. Produktet më të shtrenjta ushqimore për familjet shqiptare në raport me BE-në janë vezët, djathi dhe qumështi, që kanë kërcyer në 131% të mesatares së BE-së.
Shqipëria i ka çmimet më të shtrenjta dhe në raport me vendet e rajonit. Serbët blejnë ushqimet me çmime që janë sa 96.4% e mesatares së BE-së. Në Mal të Zi ushqimet kushtojnë sa 84.4% e mesatares së BE-së, në Bosnjë sa 83.2% dhe më të lirat, jo vetëm në Europë, por dhe në rajon janë në Maqedoninë e Veriut, sa 73.4% e mesatares së BE-së.
Bujqësia shqiptare vuan nga subvencionimi i ulët krahasuar me vendet e rajonit, por edhe emigrimin masiv që ka ulur fuqinë punëtore.
Të dhënat e fundit të Institutit të Statistikave bënë të ditur se sektori i blegtorisë është në rënie të lirë si për nga numri i krerëve, por edhe nga sasia e prodhimit. Sipas INSTAT u shënuan rënie të krerëve në të gjitha llojet e kafshëve për mish dhe qumësht, duke përfshirë edhe pulat për vitin 2024 në krahasim me 2023.
Rruga Press