Shkollat publike pa ujë të pijshëm për nxënësit
Në shkollat publike shqiptare nuk ka çezma të dedikuara nga ku fëmijët mund të pinë ujë pa pagesë.
Në një urdhër të përbashkët, Ministria e Shëndetësisë dhe ajo e Arsimit kanë përcaktuar se nxënësit duhet të kenë qasje në çdo kohë në ujë të pijshëm të freskët dhe ai të jetë falas.
Në shkolla të vetmet çezma me ujë janë ato në tualete. Në një pjesë të rasteve, sipas fëmijëve uji nuk mund të konsumohet, e në raste të tjera uji mungon tërësisht në tualete.
“Po ka ujë po nuk është i pijshëm”, thotë një nxënës.
“Na japin ujë të pijshëm, po ndonjëherë është edhe i zi (uji) në tualet”, thotë një tjetër.
Situata është më problematike në shkollat e fshatrave, pasi herë pas here mungon uji i rrjedhshëm në tualete.
Fëmijët thonë se e marrin me vete ujin e pijshëm, dhe se nuk futen nëpër tualete për shkak të papastërtisë.
“E marr ujin nga shtëpia dhe nuk shkoj në tualet, ngaqë janë shumë të pista”, shprehet një tjetër nxënës.
Në të tilla kushte ky vendim nuk është i zbatueshëm. Madje, disa nga drejtuesit e shkollave nuk janë në dijeni të kësaj rregulloreje të miratuar nga qeveria.