Shefi i mbrojtjes i Ukrainës thotë se “Forcat ruse po bombardojnë infrastrukturën thelbësore”

Ministri i Mbrojtjes i Ukrainës, Oleksiy Reznikov tha të shtunën se forcat ruse kanë “përparuar në disa drejtime”, por se mbrojtësit ukrainas “po kundërshtojnë dhe dëbojnë pushtuesit”.

“Natyrisht, armiku ka avancuar në disa drejtime, megjithatë, ai kontrollon vetëm zona të vogla. Mbrojtësit tanë po kundërshtojnë ashpër dhe po dëbojnë pushtuesit,” tha ai në një deklaratë, duke shtuar se për shkak të “ngadalësimit të ritmit sulmues dhe rezistencës së ukrainasve, Rusia po ndryshon taktikat”.

“Që nga sot, qielli i Ukrainës është më i prekshmi,” tha ai. “Agresori përdor potencialin e tij ajror dhe raketor në mënyrë gjithëpërfshirëse dhe aktive. Të gjitha llojet e aviacionit po bombardojnë qytetet tona, qytezat dhe infrastrukturën civile, duke përfshirë infrastrukturën kritike dhe infrastrukturën e rrezikshme, mes tyre — centralet bërthamore dhe hidrocentralet.”

Reznikov tha se forcat ruse po synonin ndërtesa banimi, shkolla, kopshte dhe spitale. “Armiku po shkatërron kishat dhe katedralet. Ai po bombardon stacionet hekurudhore me mijëra gra dhe fëmijë që evakuohen,” tha ai.

“Këto janë taktikat e çakejve të frikësuar”, tha ai. “Kam besim se armiku do të paguajë për çdo jetë dhe për çdo lot”.

Reznikov tha se Mariupol, Volnovakha, Kharkiv, Chernihiv, Mykolayiv dhe Kherson janë ndër qytetet ku aktualisht situata është “më komplekse”, duke shtuar: “Ne me të vërtetë shpresojmë që korridori humanitar do të funksionojë dhe ne do të jemi në gjendje të evakuojmë civilët”.

Reznikov tha se përpjekjet kryesore të forcave ruse vazhdojnë të përqendrohen në rrethimin e Kievit dhe shtypjen e rezistencës në qytete dhe qyteza.

© Rruga Press