Shefi i Bundesbank Weidmann largohet me një paralajmërim të fundit për inflacionin

FRANKFURT, 20 tetor (Reuters) – Presidenti i Bundesbank, Jens Weidmann, një kritik i pamëshirshëm i politikës monetare ultra të lehtë të Bankës Qendrore Evropiane, do të japë dorëheqjen më shumë se pesë vjet më herët, duke i hapur derën qeverisë së re Gjermane, për të zgjedhur një pasardhës më pak konfrontues.

Weidmann tha se do të largohej për arsye personale më 31 dhjetor, vetëm disa ditë pasi BQE-ja duhet të merrte një vendim kyç për shuarjen e stimulit të epokës pandemike që ka ringjallur rritjen, por gjithashtu ka shtyrë inflacionin në normën e tij më të lartë, në më shumë se një dekadë.

Ndër anëtarët më konservatorë të Këshillit Drejtues të BQE -së, Weidmann shpesh e gjeti veten në kundërshtim me politikëbërësit e tjerë të zonës së euros, gjatë dekadës së tij në krye të bankës qendrore gjermane. Ai madje paralajmëroi për rreziqet e inflacionit, në mesazhin e tij të lamtumirës për stafin e Bundesbank të Mërkurën, duke thënë: “Do të jetë vendimtare të mos shikoni në mënyrë të njëanshme rreziqet deflacioniste, por të mos humbisni as rreziqet e mundshme inflacioniste.”

Pasardhësi i Weidmann, një ish -këshilltar ekonomik i kancelares Angela Merkel, do të zgjidhet nga një qeveri e re gjermane, e cila do të formohet kur të përfundojnë bisedimet e koalicionit. Vëzhguesit e BQE-së thanë se shefat e mundshëm të Bundesbank përfshijnë Claudia Buch, aktualisht zëvendëse e Weidmann, ekonomistët Volker Wieland, Marcel Fratzscher, Lars Feld, Lars-Hendrik Röller dhe shefi ekonomist aktual i Bundesbank, Jens Ulbrich.

Isabel Schnabel, një anëtare e bordit të BQE-së, është gjithashtu një pasardhëse e mundshme, edhe pse asaj do t’i duhej të linte rolin e saj aktual, që disa argumentojnë se është një punë e profilit më të lartë. “Isabel Schnabel po bën një punë të mrekullueshme në BQE, por unë nuk mund të mendoj për askënd më të mirë se Schnabel për të udhëhequr Bundesbank në këtë moment,” tha ekonomisti i UniCredit Erik Nielsen.

“Sfond dhe përvojë e përsosur, dhe respekt i jashtëzakonshëm evropian dhe global.”

KONFLIKTI

Pas marrjes së detyrës në Bundesbank, në maj të 2011-s, ndërsa kriza e borxhit të zonës së euros u tërbua, Weidmann ishte shpesh në pakicë në BQE, duke votuar kundër lëvizjeve kryesore të politikave të shtyra nga shefat e BQE Mario Draghi dhe Christine Lagarde.

Në korrik, 53-vjeçari ishte në mesin e një grushti politikëbërësish, që kundërshtuan zotimin e BQE-së për të mbajtur normat e interesit në nivelet më të ulëta, rekord derisa inflacioni të stabilizohet në 2%.

Ndërsa ai është bërë më pak konfrontues vitet e fundit, kritikat e tij të shpeshta e bënë të vështirë për BQE -në, që të rrisë besimin e publikut në politikat e saj dhe të mbyllë një “hendek besimi” të gjerë që u hap pas krizës financiare globale të vitit 2007.

“Një president i ri i Bundesbank, më në përputhje me rrjedhën kryesore të BQE -së, mund ta bëjë më të lehtë shpjegimin e arsyetimit të politikave të BQE -së, për publikun gjerman,” tha ekonomisti i Berenberg, Holger Schmieding.

BQE, banka qendrore për 19 vendet që përdorin monedhën euro, ka luftuar me rritjen e ngadaltë të çmimeve për një dekadë, por inflacioni është rritur ndjeshëm muajt e fundit dhe të dhënat të mërkurën treguan se arriti në 3.4% në shtator. “Unë respektoj vendimin e Jens Weidmann, për të dhënë dorëheqjen nga posti i tij si President i Deutsche Bundesbank në fund të këtij viti pas më shumë se 10 vjet shërbimi, por gjithashtu më vjen shumë keq për të,” tha Presidenti i BQE Lagarde të mërkurën.

© Rruga Press