SHBA ndihma për Turqinë, Blinken premton 100 mln dollarë ndihma

Sekretari amerikan i Shtetit, Antony Blinken ka njoftuar 100 milionë dollarë ndihma humanitare për të mbijetuarit e tërmeteve në Turqi.

Shefi i diplomacisë amerikane mbërriti të dielën për një vizitë në Turqi dhe u takua me homologun Mevlut Cavusoglu. Së bashku, nga një helikopter, ata panë dëmet e shkaktuara nga katastrofa në provincën Hataj.

“Sapo pata mundësinë të mbikëqyrja Hatajën për të parë shkatërrimin, të cilin është e vështirë ta përshkruash me fjalë. Pash ndërtesa që mbaheshin, por edhe të tjera të shembura; pash çati të prishura dhe të tjera që qëndronin pranë tyre,” – u shpreh Blinken.

Blinken ndodhet në Turqi për bisedime në lidhje me zgjerimin e NATO-s dhe çështje të tjera, por shkatërrimi nga tërmetet ka eklipsuar motivet e vizitës.

Dy tërmetet që tronditën Turqinë dhe Sirinë më 6 shkurt kanë vrarë mbi 47 mijë persona, me gjasat për të gjetur të mbijetuar që tashmë janë zvogëluar ndjeshëm.

Në Siri, shkatërrimi nga lëkundjet sizmike po shoqërohet nga vonesat në shpërndarjen e ndihmave humanitare. Mbrojtja Civile lokale, e njohur ndryshe edhe si “Helmetat e Bardha”, ka qenë në vijën e parë të kërkimeve nën rrënoja, por tashmë përpjekjet e tyre janë kthyer në operacione pastrimi.

Rruga Press