SHBA dhe Japonia, thirrje për të ndaluar armët bërthamore në hapësirë

Shtetet e Bashkuara dhe Japonia po u bëjnë thirrje të gjitha kombeve që të mos vendosin ose zhvillojnë armë bërthamore në hapësirë, ka bërë të ditur ambasadorja e SHBA-së në OKB, së bashku me palën që sponsorizon një rezolutë të Këshillit të Sigurimit të OKB-së.

Linda Thomas-Greenfield tha në një takim të Këshillit të Sigurimit të OKB-së se “çdo vendosje e armëve bërthamore në orbitë rreth Tokës do të ishte e paprecedentë, e rrezikshme dhe e papranueshme”.

Njoftimi se SHBA dhe Japonia kishin qarkulluar një rezolutë pason konfirmimin e Shtëpisë së Bardhë muajin e kaluar se Rusia ka fituar një aftësi “shqetësuese” të armëve anti-satelitore, megjithëse një armë e tillë nuk është ende funksionale.

Presidenti rus Vladimir Putin deklaroi më vonë se Moska nuk ka ndërmend të vendosë armë bërthamore në hapësirë, duke pretenduar se vendi ka zhvilluar vetëm aftësi hapësinore të ngjashme me ato të SHBA-së.

Traktati i Hapësirës së Jashtme i ratifikuar nga rreth 114 vende, duke përfshirë Shtetet e Bashkuara dhe Rusinë, ndalon vendosjen e “armëve bërthamore ose çdo lloj arme tjetër të shkatërrimit në masë” në orbitë ose vendosjen e “armëve në hapësirën e jashtme në çdo mënyrë tjetër”.

Edhe gjatë Luftës së Ftohtë, hapësira ishte paqësore

Ministrja e Jashtme e Japonisë, Yoko Kamikawa, e cila kryesoi mbledhjen e këshillit, tha se edhe gjatë “mjedisit konfrontues” të Luftës së Ftohtë, rivalët ranë dakord që hapësira e jashtme të mbetet paqësore.

Ky ndalim për vendosjen e çdo arme të shkatërrimit në masë në orbitë duhet të mbahet sot, tha ajo.

Ambasadorja Thomas-Greenfield tha se të gjitha palët në traktat duhet të angazhohen për ndalimin e armëve bërthamore dhe të armëve të tjera shkatërruese, “dhe ne duhet t’u bëjmë thirrje të gjitha shteteve anëtare që nuk janë ende palë në të që të aderojnë në të pa vonesë”.

Ajo tha se Shtetet e Bashkuara mezi presin të angazhohen me anëtarët e tjerë të Këshillit të Sigurimit prej 15 vendesh “për të krijuar konsensus rreth këtij teksti”.

Zëvendës ambasadori i Rusisë në OKB, Dmitry Polyansky tha se përshtypja fillestare e Moskës është se rezoluta e propozuar është “një tjetër marifet propagandistik nga Uashingtoni”, “shumë e politizuar” dhe “e veçuar nga realiteti”.

Ai kritikoi tekstin, duke thënë se formulimi nuk u përpunua nga ekspertë dhe as nuk u diskutua në platforma të specializuara ndërkombëtare si Konferenca e OKB-së për Çarmatimin ose Komiteti i OKB-së për Hapësirën e Jashtme.

“Tensionet gjeopolitike… kanë përshkallëzuar rrezikun e luftës bërthamore”

Jashtë Këshillit të Sigurimit, Thomas-Greenfield tha se SHBA-ja është e interesuar të angazhohet me palët në traktat “për të eksploruar mënyra për të rritur besimin në përputhje” me ndalimin e armëve bërthamore dhe armëve të tjera të shkatërrimit në masë në hapësirën e jashtme.

“Shtetet e Bashkuara kanë filluar tashmë të marrin në konsideratë qasjet për të siguruar që vendet nuk mund të vendosin armë bërthamore në orbitë të papazbulueshme dhe ne synojmë të angazhohemi me shtetet e tjera palë ndërkohë që idetë tona evoluojnë,” tha ajo.
 

Rruga Press