Senati i SHBA-së voton pro ndalimit të TikTokut
Senati i Shteteve të Bashkuara të Amerikës të mërkurën vonë miratoi me votim zanor një projektligj për të ndaluar punonjësit federalë të përdorin aplikacionin e videove të shkurtra në pronësi kineze TikTok në pajisjet në pronësi të qeverisë, shkruan The Guardian.
Projektligji tani duhet të miratohet nga Dhoma e Përfaqësuesve e SHBA-së përpara se të shkojë te presidenti Joe Biden për miratim. Dhoma e Përfaqësuesve do të duhet të miratojë projektligjin e Senatit përpara se të përfundojë sesioni aktual i Kongresit javën e ardhshme.
Votimi është veprimi i fundit nga ana e ligjvënësve amerikanë për të goditur kompanitë kineze mes frikës së sigurisë kombëtare se Pekini mund t’i përdorë ato për të spiunuar amerikanët.
Avokatët e ish-presidentit Donald Trump, një nga iniciuesit për këtë projektligj, thonë se është në interes të sigurisë kombëtare ndalimi i TikTokut për shkak të lidhjeve midis ByteDance, kompanisë mëmë të aplikacionit, dhe qeverisë kineze.
Veprimi i Senatit vjen pasi Dakota e Veriut dhe Iowa këtë javë iu bashkuan një numri në rritje të shteteve amerikane në ndalimin e TikTokut, në pronësi të ByteDance, nga pajisjet shtetërore mes shqetësimeve se të dhënat mund t’i kalojnë qeverisë kineze.
Shumë agjenci federale duke përfshirë mbrojtjen, Sigurinë Kombëtare dhe departamentet e shtetit tashmë e kanë ndaluar TikTokun nga pajisjet në pronësi të qeverisë.
TikToku ka thënë se shqetësimet janë nxitur kryesisht nga dezinformatat dhe janë të lumtur të takohen me politikëbërësit për të diskutuar praktikat e kompanisë.
Senatori republikan Marco Rubio zbuloi të martën legjislacionin dypartiak për të ndaluar plotësisht TikTokun në Shtetet e Bashkuara, duke rritur presionin mbi ByteDance për shkak të frikës së SHBA-së se aplikacioni mund të përdoret për të spiunuar amerikanët dhe për të censuruar përmbajtjen.
Legjislacioni do të bllokonte të gjitha transaksionet nga çdo kompani e mediave sociale në ose nën ndikimin e Kinës dhe Rusisë.
Në një seancë dëgjimore muajin e kaluar, drejtori i FBI-së, Chris Wray, ka thënë se operacionet e TikTokut në SHBA ngrenë shqetësime për sigurinë kombëtare.
Trumpi kishte provuar ta bllokonte në tërësi TikTokun në SHBA, por dështoi pasi gjykatat e rrëzuan vendimin e tij.
CFIUS dhe TikToku kanë qenë në bisedime për muaj të tërë për të arritur marrëveshje të sigurisë kombëtare për të mbrojtur të dhënat e më shumë se 100 milionë përdoruesve amerikanë të TikTokut, por nuk duket se do të arrihet ndonjë marrëveshje përpara fundit të vitit.
Rruga Press