”S’do largohemi nga sheshi nëse nuk plotësohen kërkesat”, paralajmërimi për Ramën

Rigels Xhemollari, i cili është një ndër organizatorët e protestave të ditëve të fundit, u shpreh në Syri Tv se ditën e shtunë nuk do të largohen nga bulevardi nëse nuk plotësohen kërkesat e tyre.

Xhemollari u shpreh se Rama ka bërë propagandë dhe anti-protestë ndërsa shtoi se kryeministri është vetë putinist.

“Na ka quajtur putinistë. Elementët që janë pjesë e këtij diskursi publik e bëjnë Ramën putinist. E drejta e protestës është e drejtë qytetare. I vetmi personazh dhe lider që parandalon dhe nuk i lejon protestat është Putin, dhe në Shqipëri është Rama. S’kemi ushtruar dhunë, ndërsa policia ka ushtruar dhunë ndaj qytetarëve. Të shtunën do paraqesim sërish kërkesat, nëse Rama nuk i plotëson do vendosim të qëndrojmë aty minimalisht 24 orë deri sa të plotësohen kërkesat. Çdo gjë do vendoset aty”, tha Xhemollari.

I riu tregoi se kanë zhvilluar disa takime me grupet e interesit, fermerët, shoqatat e turizmit dhe bizneset. Xhemollari tha se kanë një kërkesë të përbashkët me 6 pika për qeverinë që të ulë çmimet të cilat prekin shumë shtresa në nevojë.

“Kërkesat kryesore që lidhen me protestën është heqja e taksës së qarkullimit 27 lekë për çdo litër naftë. Më përpara është quajtur qarkullim tashmë regjistrim dhe paguhet dyfish te drejtoria e rrugëve. E paguajnë qytetarët që kalojnë te Rruga e Kombit. Kemi vlerësuar nga mendimet e ekspertëve që kjo taksë mund të pezullohet për momentin”, tha Xhemollari.

Ndër të tjera ai shtoi se kërkojnë heqjen e TVSH-së për produktet ushqimore ashtu si në vendet e tjera të rajonit dhe Bashkimit Europian.

“Rajoni dhe vede të BE kanë reduktuar TVSH-në e ushqimeve, vezë, qumësht, miell, që janë rritur momentalisht dhe rëndojnë qytetarët. Lehtësimi nga TVSH-ja do të ulte goxha. Kemi theksuar se duhet që në Shqipëri, ndryshe nga rajoni dhe BE të përcaktohet me ligj minimumi jetik që të sigurojnë dinjitetin njerëzor.”-tha Xhemollari.

Xhemollari tha gjithashtu se kërkojnë të pezullohen disa koncesione që deri diku janë të panevojshme apo abuzive pasi nuk kanë transparencë.

Rruga Press