Rusia ka larguar me forcë afër 2 milionë njerëz nga Ukraina, nga ta më shumë se 200 mijë fëmijë

Sot është dita e 142 e pushtimit ushtarak të Ukrainës nga Rusia. Zhvillimet e fundit në dhe rreth luftës në Ukrainë janë si në vijim: 

– Të paktën 23 persona, duke përfshirë tre fëmijë, u vranë dhe deri në 66 të tjerë u plagosën pasi raketat ruse goditën ndërtesat civile dhe një qendër kulturore në qytetin Vinnytsia, në Ukrainën qendrore. Sulmi në Vinnytsia, larg vijës së frontit të luftës, ndodhi në mesditë të mëngjesit të së enjtes, kur rrugët ishin plot me njerëz. Shërbimi i emergjencave shtetërore të Ukrainës thotë se është ende në kërkim të 39 personave që konsiderohen të zhdukur, ndërsa 34 mbeten në gjendje të rëndë.

– Presidenti i Ukrainës, Volodymyr Zelenskiy, e quajti sulmin rus në Vinnytsia “një akt të hapur terrorizmi”. Në një video-fjalim në konferencën e Hagës, Zelenskiy u kërkoi zyrtarëve të gjykatës penale evropiane dhe ndërkombëtare që ta hapin një “gjykatë speciale” për ta hetuar pushtimin e Rusisë në vendin e tij.

 Një zyrtar i lartë ukrainas tha se sulmet me raketa në Vinnytsia ishin një “strategji ushtarake e miratuar” nga Vladimir Putin. Mykhailo Podolyak, kreu i ekipit negociator të Ukrainës dhe një këshilltar kryesor i Zelenskiy, tha se forcat ruse po sulmonin qytetet “paqësore” të Ukrainës si Vinnytsia, Kremenchuk, Chasiv Yar dhe Kharkiv në mënyrë që t’i detyronin ukrainasit për “paqe me çdo çmim”, ka shkruar Podolyak në Tëitter. Sulmet e Rusisë ndaj qyteteve paqësore të Ukrainës nuk ishin një gabim, por një strategji e miratuar ushtarake.

– Organi më i madh i sigurisë në botë ka shprehur “shqetësim të madh” për keqtrajtimin e pretenduar të dhjetëra mijëra ukrainasve në të ashtuquajturat qendra filtrimi të ngritura nga Rusia në Ukrainë. Dhjetëra mijëra civilë janë dërguar në këto qendra në Republikën Popullore të vetëshpallur separatiste të Donetskut në Ukrainën lindore, përpara se të deportohen në Rusi, tha Organizata për Siguri dhe Bashkëpunim në Evropë.

– Rusia ka larguar me forcë afro 2 milionë njerëz nga Ukraina, duke përfshirë më shumë se 200,000 fëmijë, që nga pushtimi i saj në muajin shkurt, tha Zelenskiy. “Është ende duke u vërtetuar se sa fëmijë u rrëmbyen dhe nxorën nga Ukraina nga forcat ruse… Shifra paraprake është e tmerrshme – rreth 200,000 fëmijë”, tha ai në Konferencën e Përgjegjshmërisë së Ukrainës në Hagë të enjten.

– Shtetet e Bashkuara dhe më shumë se 40 vende të tjera janë dakorduar t’i koordinojnë hetimet për krimet e dyshuara të luftës në Ukrainë. Të enjten, 45 vende, duke përfshirë shtetet e Bashkimit Evropian, si dhe Britaninë, SHBA-në, Kanadanë, Meksikën dhe Australinë në një konferencë në Hagë nënshkruan një deklaratë politike për të punuar së bashku. Me rreth 23,000 hetime për krime lufte tani të hapura dhe vende të ndryshme që udhëheqin ekipe, provat duhet të jenë të besueshme dhe të organizuara, thanë zyrtarët.

– Sekretarja amerikane e thesarit, Janet Yellen, ka thënë se lufta e Rusisë në Ukrainë përbën kërcënimin më të madh për ekonominë globale. Përfaqësuesit e regjimit të Putinit “nuk kanë vend” në një takim të vendeve të G20 në Bali, tha ajo, duke shtuar se do të vazhdojë t’u bëjë presion aleatëve për një tavan të çmimit të naftës ruse, i cili sipas saj do t’i mohojë Putinit të ardhurat që i duhen makinerisë  së tij të luftës. “.

– Ministri i infrastrukturës i Ukrainës, Oleksandr Kubrakov, tha se Kievi është “padyshim një hap më afër” arritjes së një marrëveshjeje për eksportin e grurit përmes porteve të saj të Detit të Zi pas bisedimeve me Rusinë, Turqinë dhe Kombet e Bashkuara. Turqia më herët njoftoi një marrëveshje me Ukrainën, Rusinë dhe OKB-në që ka si qëllim rifillimin e eksporteve të grurit ukrainas të bllokuara nga Rusia.

– Vladimir Putin nënshkroi ligjin për masa më të ashpra për individët ose subjektet që konsiderohen “agjentë të huaj” nga Rusia, si dhe një ligj të ri që barazon dezertimin me tradhtinë e lartë. Projektligji i ri, i cili do të hyjë në fuqi më 1 dhjetor, do ta zgjerojë përkufizimin e “agjentëve të huaj” për këdo që konsiderohet se ka rënë “nën ndikimin e huaj” ose ka marrë mbështetje nga jashtë, jo vetëm para të huaja.

Rusia ka filluar “mobilizimet vullnetare” për ta adresuar mungesën e saj të ushtarëve, sipas Institutit për Studimin e Luftës. Në një raport të ri, instituti me bazë në SHBA tha se Kremlini “ka të ngjarë t’i ketë urdhëruar ‘subjektet federale’ (rajonet) ruse të formojnë batalione vullnetare për të marrë pjesë në pushtimin rus të Ukrainës, në vend që të shpallin mobilizim të pjesshëm ose të plotë në Rusi./The Guardian

Rruga Press