Rusia hakmerret ndaj dërgimit të tankeve nga Gjermania dhe SHBA-ja

Rusia ka kryer të enjten një tjetër valë sulmesh me raketa ndaj Ukrainës, një ditë pasi Gjermania dhe Shtetet e Bashkuara u zotuan se do të dërgonin tanke kundër pushtimit.

Për pasojë, një person humbi jetën dhe dy të tjerë mbetën të plagosur pasi një raketë ra mbi një godinë të banuar në Kiev, bëri të ditur kryebashkiaku i qytetit.

Autoritetet njoftuan edhe goditjen e dy impianteve të energjisë në rajonin jugor të Odesës.

Episodi i radhës i dhunës erdhi pasi Moska deklaroi se do ta konsideronte dërgimin e tankeve si një përfshirje “direkte” të Perëndimit në konflikt.

Kreu i ushtrisë ukrainase deklaroi se, pala ruse kishte qëlluar 55 raketa, 47 prej të cilave ishin rrëzuar nga sistemet mbrojtëse, përfshirë 20 që do të godisnin Kievin.

Më herët, forcat ajrore ukrainase deklaruan se kishin rrëzuar edhe një tufë dronësh iranianë të nisur nga forcat ruse nga deti i Azovit, në jug të vendit.

Viktima të sulmit të së enjtes ishin një burrë 55-vjeçar, i cili humbi jetën, si dhe dy të tjerë që mbetën të plagosur kur raketat ranë në zonën jugore të kryeqytetit.

Ndërsa goditja e impianteve të energjisë ishte vazhdim i taktikës së njohur të Rusisë për të asgjësuar infrastrukturën elektrike të Ukrainës.

Në mes të dimrit të acartë, shumë stacione energjetike janë shkatërruar dhe miliona njerëz kanë përfunduar në errësirë.

Rruga Press