Rrezik për hyrjen në BE/ Kroacia akuza të forta Serbisë: Beogradi ka vjedhur trashëgiminë tonë kulturore

Ministri kroat i Punëve të Jashtme, Gordan Garlic Radman ka paralajmëruar se Serbia do të mbajë përgjegjësi për pasojat e vjedhjes së trashëgimisë kulturore të Kroacisë në bisedimet e pranimit në Bashkimin Evropian.

Deklaratat e ministrit u bënë gjatë një takimi me homologun e tij grek, Nikos Dendias gjatë një konference për të ardhmen e Evropës.

Ministri kroat përmendi hegjemoninë dhe të ashtuquajturën ‘Bota serbe’.

“Keqpërdorimi i trashëgimisë kulturore të huaj është skandaloz, por i përshtatet qartë politikës hegjemoniste të përhapjes së të ashtuquajturës ‘Bota serbe’. Konfiskimi i trashëgimisë kulturore të Kroacisë nuk është në përputhje me vlerat evropiane dhe perspektivën që ka zgjedhur Serbia dhe sigurisht që do të ketë disa pasoja kur të hapen disa kapituj kyç, siç është arsimi.”

Në 23 dhjetor të vitit që lamë pas, Serbia miratoi Ligjin për Trashëgiminë Kulturore, në të cilin përfshiheshin materiale të vjetra e botime të rralla të letërsisë së Dubrovnikut, të cilat deri në 1867 i përkisnin kulturës serbo-kroate.

Pas miratimit të ligjit, ambasada kroate në Beograd paralajmëroi autoritetet serbe se e konsideronte të papranueshme përvetësimin e trashëgimisë kulturore të Kroacisë.

Serbia tha se e konsideronte letërsinë dubrovnikase të përbashkët me atë të Kroacisë.

Ministrja kroate e kulturës shtoi se dispozitat ligjore të Serbisë mbi letërsinë e Dubrovnikut ishin të pabazuara profesionalisht dhe i bëri thirrje Beogradit që të ndalonte cenimin e trashëgimisë kulturore të Kroacisë.

Në 19 janar, eurodeputeti kroat Carlo Ressler i bëri thirrje Komisionit Evropian që të nxjerrë një dispozitë për Aktin e Trashëgimisë Kulturore të Serbisë.

Rruga Press