Rikthimi i Trumpit në Shtëpinë e Bardhë do të mund t’i kushtonte Bashkimit Evropian të paktën 150 miliardë euro
Një fitore e Trump mund të shkaktojë një goditje prej 1 për qind të GDP-së në ekonominë e eurozonës, me Gjermaninë, Italinë dhe Finlandën më të prekura.
Kërkesat e reja të NATO-s dhe ndërprerja e mundshme e ndihmës së SHBA-së për Ukrainën, mund të tensionojnë më tej Evropën.
Rizgjedhja e mundshme e Donald Trump si president i SHBA përbën një kërcënim të rëndësishëm për ekonominë e eurozonës, me ekonomistët që paralajmërojnë për një goditje të mundshme prej 150 miliardë eurosh, ekuivalente me rreth 1 për qind të GDP-së të rajonit. Ky ndikim rrjedh nga pasojat e parashikuara negative tregtare dhe rritja e shpenzimeve të mbrojtjes.
Sulmi i fundit në Butler, Pensilvani, ku ish-presidenti Trump pësoi një lëndim në vesh, ka rritur shanset e tij për rizgjedhje.
Tregjet e parashikimit i vendosin tani shanset e Trump për të fituar në 71 për qind, një rritje e konsiderueshme nga shifrat e mëparshme, ndërsa kundërshtari i tij, Joe Biden, ka përjetuar një rënie, me shanset e tij që kanë rënë në 18 për qind nga kulmi prej 45 për qind vetëm dy muaj më parë.
Ekonomistët James Moberly dhe Sven Jari Stehn nga Goldman Sachs kanë ngritur alarmin mbi pasigurinë e afërt në politikat e tregtisë globale, duke tërhequr paralele me paqëndrueshmërinë e përjetuar në 2018 dhe 2019. Ata argumentojnë se qëndrimi agresiv tregtar i Trump mund të rindez këto pasiguri.
“Trump është zotuar të vendosë një tarifë të përgjithshme prej 10 për qind për të gjitha importet e SHBA, përfshirë nga Evropa”, nënvizoi Goldman Sachs në një shënim të fundit.
Ekonomistët parashikojnë se rritja e pasigurisë së politikës tregtare, e cila më parë uli prodhimin industrial të Eurozonës me 2 për qind në 2018-19, tani mund të rezultojë në një rënie prej 1 për qind të GDP-së të euro zonës.
Gjermania, fuqia industriale e Evropës, pritet të mbajë peshën kryesore të këtij ndikimi.
“Ne vlerësojmë se efektet negative të pasigurisë së politikës tregtare janë më të mëdha në Gjermani se kudo në Eurozonë, duke reflektuar hapjen më të madhe dhe mbështetjen e saj në aktivitetin industrial”, shpjegoi Goldman Sachs.
Raporti theksoi se sektori industrial i Gjermanisë është më i prekshëm ndaj ndërprerjeve tregtare, në krahasim me ekonomitë e tjera të mëdha të Eurozonës si Franca.
Pas Gjermanisë, Italia dhe Finlanda parashikohen të jenë përkatësisht vendet e dyta dhe të treta më të prekura, për shkak të peshës relativisht më të lartë të aktivitetit prodhues në ekonomitë e tyre.
Sipas një studimi të Eurostat të publikuar në shkurt 2024, Gjermania (157.7 miliardë euro), Italia (67.3 miliardë euro) dhe Irlanda (51.6 miliardë euro) ishin tre eksportuesit më të mëdhenj të Bashkimit Evropian në Shtetet e Bashkuara në 2023.
Gjermania mbajti gjithashtu suficitin më të madh tregtar (85.8 miliardë euro), e ndjekur nga Italia (42.1 miliardë euro).
Një fitore e Trump-it gjithashtu ka të ngjarë të sjellë presione të reja të mbrojtjes dhe sigurisë në Evropë. Trump ka nxitur vazhdimisht që anëtarët e NATO-s të përmbushin angazhimet e tyre për shpenzimet e mbrojtjes prej 2 për qind të GDP-së. Aktualisht, anëtarët e BE-së shpenzojnë rreth 1.75 për qind të GDP-së për mbrojtjen, duke kërkuar një rritje prej 0.25 për qind për të përmbushur objektivin.
Rruga Press