Rashiq dështon në tentimin e parë për nënkryetar të Kuvendit – opozita shqiptare nuk i dha votën

Deputeti i vetëm serb në Kuvend që nuk i takon Listës Serbe, Nenad Rashiq, nuk arriti të zgjidhet nënkryetar i Kuvendit të Kosovës në votimin e parë të mbajtur mbrëmë. Përkundër se ishte kandidatura e vetme që respekton Kushtetutën e Kosovës dhe distancohet nga ndikimi i Beogradit, partitë opozitare shqiptare nuk e mbështetën.

Sipas rezultateve të votimit, PDK abstenoi, ndërsa LDK dhe AAK nuk morën pjesë fare në votim. Kjo sjellje ka ngjallur kritika të shumta, pasi konsiderohet si një hezitim i opozitës për t’u rreshtuar me një kandidat serb që e njeh shtetin e Kosovës dhe që është alternativë e qartë ndaj Listës Serbe, e cila është komprometuar me akte terroriste, shantazh politik dhe struktura ilegale në veri.

Dy mundësi të tjera për Rashiqin

Sipas procedurës kushtetuese, kandidatura e Rashiqit mund të vihet në votim edhe dy herë të tjera. Këto votime do të jenë një test i rëndësishëm jo vetëm për funksionalitetin e Kuvendit, por edhe për vetë opozitën shqiptare.

Nëse PDK, LDK dhe AAK vendosin sërish të mos e mbështesin Rashiqin, kjo do të shihet si rreshtim me Listën Serbe, e cila historikisht ka shërbyer si instrument i Beogradit dhe jo si përfaqësues legjitim i komunitetit serb në Kosovë.

Gur prove për opozitën

Ky proces është një gur prove politik: a do të zgjedhin partitë opozitare shqiptare të përkrahin një serb që e njeh Kosovën si shtet të pavarur dhe respekton rendin kushtetues, apo do të vazhdojnë të bllokojnë me qëndrime që, në praktikë, i shërbejnë Listës Serbe dhe Beogradit?

Rruga Press