Raportuesi i PE-së për Serbinë mesazh Vuçiçit: BE-ja nuk është një bufe ku mund të zgjedhësh

Presidenti i Serbisë, Aleksandër Vuçiç e sheh Bashkimin Evropian si një bufe: zgjedh vetëm bashkëbiseduesit që i përshtaten, dhe vazhdimisht i konsideron kritikët nga Bashkimi Evropian si armiq, tha raportuesi i Parlamentit Evropian për Serbinë, Tonino Picula. Sipas tij, Vuçiç i trajton në të njëjtën mënyrë edhe rivalët politikë vendas, madje edhe qytetarët e Serbisë.

Në një intervistë për “Vecernji list”, Picula foli për sulmet e vazhdueshme të Vuçiç.

Deklaratat me karakter sulmi të Vuçiç erdhën pak ditë para se delegacioni i Parlamentit Evropian, i udhëhequr nga Tonino Picula, të jetë në Beograd, nga 22 deri më 24 janar.  Presidenti i Serbisë, së bashku me kryetaren e Asamblesë Kombëtare Ana Brnabiç, njoftuan se po refuzojnë të flasin me Piculën dhe delegacionin e tij. “Ata u ulën, urrejtësit e Serbisë, dhe pranuan të vinin në Beograd. Nuk na pyetën, nuk na informuan”, ka përsëritur Vuçiç prej ditësh.

Picula tha se do të ketë më shumë sulme të tilla dhe se Vuçiç nuk po heq dorë prej tyre.

Sipas tij, pyetja që lind është: A dëshiron Serbia, me Vuçiçin në krye, të anëtarësohet fare në Bashkimin Evropian? “Deklarativisht – po, por në praktikë po bën gjithçka për ta shmangur atë”, tha ai.

“Më duket se presidenti i Serbisë e sheh Bashkimin Evropian si një bufe: ai zgjedh vetëm bashkëbiseduesit që i përshtaten, dhe vazhdimisht i konsideron kritikët nga i njëjti Bashkim Evropian si armiq. Sipas mendimit tim, kjo nuk është asgjë e re apo e çuditshme, sepse ai i trajton në të njëjtën mënyrë edhe rivalët politikë vendas, dhe do të thoja edhe qytetarët e Serbisë… Pra, në mënyrën e tij të njohur, Vuçiç flet kryesisht ose me një pasqyrë, ose vetëm me gazetarë të zgjedhur, të cilët më pas përcjellin perceptimin e tij për atë se çfarë është situata në Serbi dhe përreth Serbisë. Prandaj, asgjë e çuditshme”, thekson Tonino Picula, në një intervistë për “Vecernji list”.

Raportuesi i Parlamentit Evropian për Serbinë përsëriti se Parlamenti Evropian, ku ai është përfaqësues me kolegë të tjerë parlamentarë, mbështet vazhdimisht politikën e zgjerimit të Bashkimit Evropian, duke përfshirë Serbinë.

‘Megjithatë, kjo politikë ka qëllimet dhe metodologjinë e vet… Të tjerë para meje, të cilët nuk ishin as në grupin tim politik, gjithmonë kanë theksuar të njëjtat probleme në raportet e tyre, të cilat, për fat të keq, nuk po zgjidhen në Serbi. Do të thosha se veçanërisht në vitin e fundit, këto probleme vetëm sa janë grumbulluar. Vuçiç fajëson të gjithë të tjerët për problemet e Serbisë përveç tij dhe sistemit që ai ka udhëhequr prej vitesh”, tha Picula.

Rruga Press