Qeveria serbe seancë të jashtëzakonshme për situatën në Kosovë, Vuçiqi takohet me ambasadorin kinez e rus

Nesër në orën 10:00 u caktua mbledhje e jashtëzakonshme e Qeverisë së Serbisë për, siç është thënë, situatën në Kosovë.

Por, para mbledhjes së nesërme, Aleksandar Vuçiq, për sot në orën 11:00, ka planifikuar konsultime edhe me ambasadorin kinez Chen Bo, ndërsa në orën 11:30 do të takohet me ambasadorin rus në Serbi, Aleksandar Bocan Harchenko.

Sonte Vuçiqi përmes të dërguarit të BE-së për dialogun ndërmjet Beogradit dhe Prishtinës, Miroslav Lajçak, do t’i informojë SHBA-në dhe BE-në për qëndrimet e serbëve të Kosovës lidhur me “situatën aktuale të tensionuar në veri të Kosovës”.

Sipas mediave serbe, gjatë gjithë natës së kaluar presidenti i Serbisë ka pasur bisedime përfaqësuesit serbë në Kosovë, të cilët janë plotësisht të kontrolluar prej tij. “72 orët e ardhshme do të jenë më të vështirat në 10 vjetët e fundit”.

Më tutje thuhet se këta përfaqësues, që më shumë se sa përfaqësojnë qytetarët serbë në Kosovë përfaqësojnë Vuçiqin në Kosovë, do të kenë edhe një sërë takimesh, ndërsa të shtunën pritet një tubim në Mitrovicë, ku do të zbulojnë planin e tyre para qytetarëve.

Të gjitha këto po bëhen për shkak të targave RKS dhe shkarkimit të drejtorit rajonal të Policisë në veri të Mitrovicës, i cili bëri thirrje për mosbindje ndaj vendimeve të qeverisë.

Rruga Press