“Putini dhe rrethi i tij janë të dënuar”, gazetarët rusë postojnë artikuj kritikë për pushtimin e Ukrainës në faqen pro Kremlinit

Dy reporterë rusë kanë postuar të paktën 30 artikuj në një faqe lajmesh pro-Kremlinit, “lenta.ru”, të hënën duke kritikuar pushtimin e Ukrainës nga presidenti rus Vladimir Putin dhe shtypjen e kritikëve nga qeveria e tij.

CNN raporton se shqyrtoi artikujt, të cilët u hoqën pothuajse menjëherë. Disa prej tyre ishin të lidhura me 77-vjetorin e humbjes së Gjermanisë naziste nga Bashkimi Sovjetik, të tjerë duke kritikuar liderin rus për përdorimin e Ditës së Fitores për të justifikuar sulmin e tij të përgjakshëm në Ukrainë.

Gazetarët Egor Polyakov dhe Alexandra Miroshnikova pretenduan në artikujt e tyre se zyrtarët rusë të mbrojtjes po “gënjenin të afërmit” e atyre që u vranë në fundosjen e anijes së Flotës së Detit të Zi të Marinës ruse Moskva dhe akuzuan Putinin për nisjen e një prej “luftërave më të përgjakshme” të shekullit të 21-të”.

“Putini dhe rrethi i tij janë të dënuar të përballen me një gjykatë pas përfundimit të luftës,” publikuan Polyakov dhe Miroshnikova në lenta.ru. “Putini dhe bashkëpunëtorët e tij nuk do të jenë në gjendje të justifikojnë veten, ose të ikin pas humbjes së kësaj lufte.”

Polyakov dhe Miroshnikova janë të dy redaktorë biznesi në “lenta.ru”, një faqe e madhe lajmesh ruse pro Kremlinit. Kompania mëmë u ble së fundi nga Sberbank ruse, e cila është subjekt i sanksioneve të SHBA-së për pushtimin e Rusisë në Ukrainë.

Faqja e pavarur ruse e lajmeve Mediazone publikoi atë që tha se ishte një deklaratë nga Polyakov dhe Miroshnikova pas publikimit të artikujve.

“Putini është një diktator paranojak,” citohen të kenë thënë ata. “Putini duhet të largohet. Ai filloi një luftë të pakuptimtë dhe po e çon Rusinë në gropë”.

Polyakov dhe Miroshnikova jo vetëm që kundërshtuan publikisht linjën e qeverisë për pushtimin, por e akuzuan Putinin se gënjeu për qëllimet e tij në Ukrainë që në fillim.

“Putini në mënyrë të përsëritur gënjeu për planet e tij për Rusinë në Ukrainë, duke përmendur një qëllim në fillim dhe më pas një krejtësisht tjetër”.

Ata vunë në dukje thirrjen e Putinit për një “çlirim të Donbasit”, “de-nazifikimin” dhe “çmilitarizimin e Ukrainës”, si shembuj të asaj që ata e përshkruajnë si justifikime të nxituara për një luftë të panevojshme.

Rruga Press