Protestat në Tunizi, presidenti shkarkon kryeministrin dhe “ngrin” parlamentin
Presidenti tunizian, Kais Saied, pezulloi punën e parlamentit për 30 ditë dhe shkarkoi kreun e qeverisë, Hichem Mechichi, pas një dite protestash kundër ekzekutivit.
Kreu i Shtetit i njoftoi këto masa në një kohë kur Tunizia përballet me kulmin e epidemisë Covid dhe një krizë të thellë politike që ka paralizuar vendin për muaj me radhë. Demonstrata të dhunshme u regjistruan në disa qytete, ndërkohë që policia përdori gaz lotsjellës për të shpërndarë turmën.
“Ne kemi vendosur të pezullojmë Parlamentin dhe të heqim imunitetin e deputetëve. Kushdo që mendon të përdorë armët dhe kushdo që qëllon, qoftë edhe një herë, e di se forcat e armatosura do të përgjigjen duke qëlluar”, tha presidenti Saied.
E gjithë zona përreth ndërtesave qeveritare, aktualisht është e blinduar dhe e mbrojtur nga forcat e sigurisë, parlamenti, selia e televizionit dhe ndërtesa e qeverisë.
Drejtori i Përgjithshëm i Sigurisë Presidenciale, Khaled Yahyaoui, është emëruar përkohësisht në krye të Ministrisë së Brendshme.
Saied theksoi se ngrirja e Parlamentit për 30 ditë, heqja dorë nga imuniteti i deputetëve dhe shkarkimi i kryeministrit nuk përfaqësojnë “një grusht shteti”./a2/