Presidenti gjerman Frank-Walter Steinmeier zgjidhet për mandat të dytë

Presidenti i Gjermanisë Frank-Walter Steinmeier sot u zgjodh nga Parlamenti për një mandat të dytë.

Politikani 66-vjeçar fitoi mbështetje nga i gjithë spektri politik demokratik, duke përfshirë qeverinë e koalicionit të majtë-liberal dhe partitë konservatore të opozitës.

Në raundin e parë të votimit, Steinmeier mori 1,045 nga 1,425 vota të vlefshme nga anëtarët e Asamblesë Federale, e cila përbëhet nga 736 ligjvënës dhe një numër i barabartë delegatësh nga shtetet federale të Gjermanisë.

Steinmeier shihet gjerësisht si një nga politikanët më me përvojë të Gjermanisë. Politikani i shquar socialdemokrat shërbeu dy herë si ministër i Jashtëm, në 2005-2009 dhe më vonë në 2013-2016, në qeveritë e koalicionit të udhëhequr nga kancelarja e atëhershme Angela Merkel.

Pozicioni presidencial konsiderohet kryesisht si një rol ceremonial që mbart pak kompetenca. Shpesh mbahet nga një politikan, i cili shihet si një figurë unifikuese dhe busull moral i rëndësishëm për gjermanët në kohë pasigurie politike dhe ekonomike.

Votimi i tij erdhi në kohën kur rreth 100,000 trupa ruse janë grumbulluar në kufijtë e Ukrainës, me Gjermaninë dhe vendet e tjera perëndimore duke punuar për të shmangur atë që SHBA ka paralajmëruar se mund të jetë pushtim i afërt.

Rruga Press