Portieri që luftoi në Ukrainë kthehet në Itali

Ish-portieri i Serie C, Ivan Luca Vavassori, që luftoi për disa javë me ushtrinë e Ukrainës kundër Rusisë në Mariupol është kthyer në Itali.

Kishte raportime se Vavassori ishte vrarë gjatë luftimeve në fabrikën e çelikut në Mariupol, por babai i tij zbuloi se ai ishte shtruar në spital pas plagëve të shumta. Prokurori i Milanos ka hapur një hetim mbi misionin e tij në Ukrainë.

Vavassori tani ka dalë nga spitali dhe është kthyer në shtëpi.

“Kam luftuar për një kohë të mjaftueshme, por tani është koha t’i rikthehem jetës sime”, ka shkruar ish-portieri që u lind në Rusi në vitin 1992.

Ai u birësua nga familja Vavassori në Itali.

“Kam lënë shumë gjëra pas. Tani më duhet t’i kthehem normalitetit. E kam zemrën plot gëzim, duke e ditur se bëra gjithçka që munda”, është shprehur ai.

Në vitin 2015, Vavassori ishte titullar kundër Milanit në ndeshjen debutuese të portierit Gigio Donnarummas. Atëbotë, ai mbronte për Pro Patrian.

Rruga Press