Polonia gjen mbetjet e 10 dronëve rusë që fluturuan brenda territorit të saj

Në mbrëmjen e 10 shtatorit, Polonia ka gjetur mbetjet e 10 dronëve rusë që fluturuan brenda hapësirës së saj ajrore gjatë natës, afërsisht gjysmën e numrit total të identifikuar.

Sipas RMF24, të cituara nga European Pravda, Ministria e Brendshme e Polonisë raportoi se deri në orën 15:00 me orën lokale, mbetjet e UAV-ve ishin lokalizuar në disa rajone, kryesisht në vojvodinën Lublin, pranë kufirit me Ukrainën dhe Bjellorusinë.

Mbetjet u gjetën në vendbanimet Chosnówka dhe Zablocze-Kolonia (afër qytetit të Biała Podlaska), Chesniki (pranë Zamość), Wyriki dhe Wielki Łan (afër Włodawa), si dhe Krzywoverka Kolonia dhe Wygale (afër Parczew).

Gjithashtu, mbetje dronësh u zbuluan edhe më në brendësi të Polonisë: në Mniszków, në juglindje të Łódź-it, dhe në Olesno pranë Elbląg, afër Gdańskut, më shumë se 200 kilometra nga kufiri lindor i vendit.

Në Lublin u raportua edhe për mbetje raketash, megjithatë nuk dihet nëse hynë në territor gjatë këtij sulmi apo më herët. Një prej dronëve shkatërroi çatinë e një shtëpie dhe dëmtoi një automjet.

Shërbimet e specializuara dhe prokurorët po punojnë në vendet ku janë gjetur mbetjet. Kryeministri polak Donald Tusk tha se ushtria kishte regjistruar fillimisht 19 shkelje të hapësirës ajrore, ndërsa raportet mediatike flasin për mbi 20 dronë që depërtuan deri në 250 km brenda territorit polak.

Në anën tjetër, zëdhënësi i qeverisë polake, Adam Szłapka, njoftoi se NATO ka thirrur nenin 4 të Traktatit të Atlantikut të Veriut, si reagim ndaj sulmeve me dronë rusë mbi territorin e Polonisë.

Nga Moska, reagimet e para e cilësuan situatën si “provokim”, duke pretenduar se Rusia nuk kishte synim të sulmonte Poloninë dhe se dronët e përdorur kundër Ukrainës nuk kanë rreze të mjaftueshme për të depërtuar kaq thellë në Poloni.

Rruga Press