Përfshirja me kompanitë ruse vendos Serbinë përballë sanksioneve, Vuçiq: Nuk kam lajme të mira

Presidenti serb Aleksandar Vuçiç ka pranuar sfidat e ardhshme në lidhje me sanksionet e mundshme të SHBA-së kundër Naftna Industrija Srbije (NIS), një kompani kryesore energjetike në Serbi, në bashkëpronësi nga gjigandi rus energjetik Gazprom. Pas bisedimeve me nënsekretarin e SHBA-së për Rritjen Ekonomike, Energjinë dhe Mjedisin, Jose Fernandez, Vuçiç pranoi se nuk kishte “shumë lajme të mira” për të ndarë.

NIS zotërohet kryesisht nga gjigandët rusë të energjisë Gazprom Neft dhe Gazprom, të cilët mbajnë përkatësisht 50% dhe 6.15% të aksioneve, ndërsa qeveria serbe zotëron 29.87%.

Në dhjetor, Vuçiç tha se SHBA po planifikonte të vendoste sanksione ndaj NIS për shkak të pronësisë së saj ruse, me masa që mund të hyjnë në fuqi nga ky muaj. Ai njoftoi planet për t’u përfshirë në diskutime me zyrtarët e SHBA dhe rusë për të garantuar sigurinë energjetike të Serbisë.

Vuçiç më parë tha se sanksionet ndaj NIS mund të prishin furnizimin me naftë të Serbisë, veçanërisht përmes një tubacioni nga Kroacia, i cili është vendimtar për nevojat e vendit për energji.

Në një postim në Instagram të enjten, Vuçiç shkroi se kishte zhvilluar “një bisedë të hapur, të sinqertë dhe të vështirë” me Fernandez.

“Do të jem në gjendje të zbuloj detajet e plota brenda pak ditësh. Sigurisht që nuk kam shumë lajme të mira për qytetarët e Serbisë, por Serbia do ta ruajë stabilitetin dhe sigurinë e saj energjetike”, tha ai.

Lideri serb tha dy javë më parë se kishte pasur një bisedë telefonike me ministrin e Jashtëm rus Sergej Lavrov, gjatë së cilës u pajtuan të organizojnë një takim mes ekspertëve nga të dyja vendet.

Rruga Press