Për shkak të grevës të stafit të sigurisë, anulohen qindra fluturime në Gjermani

Qindra fluturime u anuluan në aeroportet kryesore të Gjermanisë sot për shkak të grevës së stafit të sigurisë lidhur me pakënaqësitë e vazhdueshme rreth pagave, raportoi agjencia “AA” të martën.

Aeroporti i Frankfurtit, qendra më e ngarkuar e vendit, sot do të trajtojë vetëm pasagjerët transit, pasi pikat e kontrollit të sigurisë për pasagjerët që udhëtojnë do të mbeten të mbyllura gjatë gjithë ditës.

Pothuajse të gjitha fluturimet nga aeroporti i Hamburgut u anuluan për shkak të grevës njëditore, sipas deklaratës së operatorit.

Ndërprerje të mëdha dhe anulime fluturimesh priten gjithashtu në aeroportet e Berlinit, Bremenit, Koelnit, Duesseldorfit, Hannoverit dhe Stuttgartit.

Pasagjerëve iu kërkua të kontaktojnë kompaninë e tyre ajrore ose operatorin turistik përpara se të nisen për aeroport në mënyrë që të informohen për statusin aktual të fluturimit të tyre dhe të marrin pak bagazhe dore nëse është e mundur.

Sindikata “Ver.di”, e cila përfaqëson rreth 25.000 punonjës sigurie, po kërkon rritje të pagave dhe përmirësime të tjera të kushteve të punës.

Negociatat e fundit rreth pagave midis sindikatës dhe Shoqatës së Kompanive Federale të Sigurisë së Aviacionit (BDLS) u mbajtën në Berlin javën e kaluar, por përfunduan pa rezultat.

Raundi tjetër i bisedimeve pritet të zhvillohet të enjten në Frankfurt.

Rruga Press