Pas rikthimit të terminalit doganor të Trepçës, Qeveria: Ky është veç fillimi

Kryeministri Albin Kurti në rihapjen e terminalit doganor të Trepçës ka thënë se sot është një ditë e rëndësishme, duke shtuar se është një e arritur që i ndihmon të gjithë.

Ai ka thënë se ky terminal ndihmon në të bërit biznes, duke u hequr një kosto e panevojshme për të mundësuar operimin më të lehtë.

“Nga viti 2003 deri në vitin 2014 ky terminal ka qenë në hapësirën e Trepçës, padrejtësisht ky terminal është mohuar dhe çmimi është shtrenjtuar për 40 euro për maune. Shtatë vjet më vonë ne po e bëjmë këtë hapje të terminalit doganor dhe po e korrigjojmë një dëm të bërë. Aso kohe mbi 20 punëtor patën punuar e pastaj kanë mbetur pa punë”, ka thënë ai.

Kurti ka shtuar se terminali është rikthyer aty ku e ka vendin.

Ministri i Financave Hekuran Murati ka thënë se kjo është një e hyrë komplementare e Trepçës.

Sipas tij, Trepça do t’i rikthehet punës si motor i zhvillimit ekonomik.

Ministrja Artane Rizvanolli ka thënë se është kënaqësi të shihet rikthimi i rolit të ndërmarrjeve publike përtej rolit industrial.

Rruga Press