Partia socialiste heq Naim Frashërin nga lista e dekoratave që jep presidenti i Shqipërisë
Nga Artur Shkurti
Duke shpërfilluar vlerësimin Poet Kombëtar që i bën Kombi Shqiptar Emri “Naim Frashëri”, me ligjin 93/2022 miratuar në 2024 është hequr nga lista e dekoratave që jep Presidenti i Republikës. Kjo është baraz me heqjen e titullit Poet Kombëtar. Është gjëja më e rëndë, më antikombëtare, më e turpshme, që mund të bëjë një parti politike. Një komb i merr energjitë nga frymëzimi kombëtar dhe frymëzimi kombëtar më i lartë u erdhi shqiptarëve nga Poeti Kombëtar Naim Frashëri. Për Naim Frashërin ka nevojë kombi shqiptar edhe gjatë shekujve që vijnë.
Si ka qenë situata ligjore? Urdhri “Naim Frashëri” ka qenë historikisht i parashikuar në ligjet për dekoratat. Në ligjin 8113, të vitit 1996, “Për dekoratat në Republikën e Shqipërisë” ekzistonte Urdhri “Naim Frashëri”. Neni 10 i këtij ligji thoshte “Urdhri “Naim Frashëri” u jepet qytetarëve shqiptarë dhe të huaj, punonjësve të shkencës, artit, kulturës dhe arsimit për vepra dhe veprimtari të çmuara. Ky urdhër do të jetë i artë dhe i argjendtë.” Mënyra e përcaktimit ishte qëllimisht e gjerë dhe jo vetëm për arsye pa-triotike, pikërisht se Naim Frashëri të lejonte edhe kapjen kombëtare dhe atë humane njerëzore.
Në vitin 2013, ligji 112/2013 “Për dekoratat, titujt e nderit, medaljet dhe titujt vendorë të nderit në Republikën e Shqipërisë” e gjejmë si “Titulli Naim Frashëri” Neni 7, pika 11. Citojmë: “Titulli “Naim Frashëri”, i cili u jepet personaliteteve shqiptare dhe të huaja, punonjësve të shkencës, artit, kulturës dhe arsimit për veprimtari të çmuara dhe lartësimin e Republikës së Shqipërisë në fushën përkatëse”. Kalimi nga Urdhër në titull duket një shkallë më poshtë dhe heqja e dy shkallëve “argjend” dhe “ar” është përsëri drejt një shpërfillje. Por sidoqoftë emri është.
Në 2022 Edi Rama heq emrin “Naim Frashëri” nga dekoratat Në ligjin 93/2022 e propozuar nga Edi Rama u hoq nga lista “Naim Frashëri”. Në asnjë diskutim apo relacion nuk denjohet të disktuhet kjo. Ligji u miratua, por u kthye nga Presidenti. Presidenti Begaj në asnjë pikë nuk shpreh ndonjë vërejtje për heqjen e kësaj dekorate, por diskuton për gjëra kot. Ligji u miratua më 8 shkurt 2024 nga Parlamenti i Shqipërisë dhe kështu emri “Naim Frashëri” nuk do të jetë më në asnjë dekoratë të dhënë nga Presidenti. Këto veprime Edi Rama i bën pasi me ligj 27/2018 dhe me VKM 146, datë 10 mars 2021, shfuqiz-oi statusin Muze Kombëtar të Arsimit për “Mësonjëtoren e parë shqipe” Korçë, kryevepër e Rilindjes Kombëtare dhe nismë e Naim Frashërit dhe Sami Frashërit. Është në nderin e Opinionit Publik Shqiptar të ushtrojë presion ndaj Parlamentit Shqiptar e të mbrojë me ligj statusin e Naim Frashërit si Poet Kombëtar dhe të mbrojë Rilindjen Kombëtare.
Rruga Press