Papa Françesku, gati për një mysafir jo të zakontë në Vatikan
Presidenti amerikan Joe Biden do të takohet me Papa Françeskun në Vatikan të premten, raporton Reuters.
Biden merr pjesë rregullisht në meshë çdo javë dhe mban një fotografi të Papës pas tryezës së tij në Zyrën Ovale. Vizita vjen në një kohë kur presidenti amerikan është nën presion të fortë për shkak të qëndrimit të tij të paqartë ndaj abortit.
Biden tha se ai personalisht kundërshton abortin, por gjithashtu se si lider i zgjedhur nuk mund të imponojë pikëpamjet e tij. Por mediat konservatore katolike dhe peshkopët konservatorë amerikanë e kritikojnë atë për këtë dhe disa argumentojnë se ai nuk duhet të marrë Kungimin e Shenjtë.
Në të njëjtën kohë, ithtarët e të drejtës për abort janë të tmerruar nga një ligj i ri në Teksas që ndalon pothuajse plotësisht abortin.
Administrata Biden po sfidon ligjin dhe Gjykata e Lartë do të dëgjojë çështjen të hënën e ardhshme. Nuk dihet nëse Biden dhe Papa do të diskutojnë abortin dhe kungimin në një takim privat të premten, i pari që kur Biden mori detyrën.
Papa u tha gazetarëve muajin e kaluar se aborti ishte një “vrasje”. Por ai gjithashtu kritikoi peshkopët katolikë amerikanë për qasjen e çështjes politikisht dhe jobaritore.
“Kungimi nuk është një shpërblim për të përsosurit… Kungimi është një dhuratë, prania e Jezusit dhe Kishës së tij,” tha ai.
Peshkopët duhet t’u qasen politikanëve katolikë që mbështesin të drejtën e abortit me “dhembshuri dhe butësi”, shtoi Papa.
Papa Françesku beson se Kisha duhet të kundërshtojë abortin, por edhe se kjo çështje nuk duhet të jetë beteja më e rëndësishme në luftërat kulturore që largon vëmendjen nga çështje të tilla si migrimi dhe varfëria.