Panairi “Prishtina 2024”, mundësi për tërheqjen e investitorëve të rinj

Është hapur sot Panairi i Përgjithshëm Ndërkombëtar “Prishtina 2024”, i organizuar nga Oda Ekonomike e Kosovës.

Zëvendëskryeministri i Kosovës, Besnik Bislimi tha se ngjarje si kjo ndihmojnë në promovimin dhe rrjetëzimin e bizneseve lokale, tërheqin investitorë të rinj, nxisin eksportet si dhe gjenerojnë të ardhura për bizneset.

Ai potencoi se organizmi i panaireve ndikon që Kosova të ketë një ekonomi më të fortë dhe dinamike.

Bislimi shtoi se për vendin tonë është me rëndësi që Kosova të pozicionohet sa më fortë në treg.

Kryetari i Odes Ekonomike të Kosovës, Lulzim Rafuna derisa foli për rëndësinë e këtij panairi tregoi se organizimi i një eventi të tillë është një mundësi e përparimit, i cili krijon mundësinë për investime të reja, diskutime dhe partneritete të reja.

Ai shtoi se gjatë këtij panairi do të këtë diskutime të rëndësishme mbi investimet, fondin e sfidave të rajonit dhe prezantimin e ndërmarrjeve të suksesshme.

Ministri i Bujqësisë, Faton Peci tha se ky panair në aspektin e zhvillimit ekonomik ka një investim që kthehet, ngase fuqizohet aspekti i rrjetëzimit dhe ndërtoj ura për bashkëpunime.

Panairi “Prishtina 2024” do të jetë i hapur deri më 31 maj. /kp/

Rruga Press