Pakistani teston sërish një raketë mes tensionesh me Indinë

Pakistani ka kryer të hënën një test të dytë rakete brenda tre ditësh, me arsyetimin se po përgatitej për një inkursion nga India.

Marrëdhëniet midis fqinjëve të armatosur me armë bërthamore janë prishur që kur persona të armatosur vranë 26 persona më 22 prill, në një sulm që synonte turistët hindu në Kashmirin Indian, sulmi më i keq i tillë ndaj civilëve në Indi në gati dy dekada, raporton Reuters.

India ka akuzuar Pakistanin për përfshirje. Islamabadi i ka mohuar akuzat, por ka thënë se ka informacione që Neë Delhi synon të nisë së shpejti aksionin ushtarak kundër tij.

Shpërthimi diplomatik dhe shkëmbimi i armëve të lehta përtej kufirit në Kashmir ka alarmuar fuqitë botërore dhe rajonale.

Kompania amerikane e shërbimeve financiare “Moody’s” ka thënë se kjo mund të dëmtojë ekonominë e Pakistanit prej 350 miliardë dollarësh, e cila është në rrugën e rimëkëmbjes pasi siguroi një program shpëtimi prej 7 miliardë dollarësh nga Fondi Monetar Ndërkombëtar vitin e kaluar dhe duke shmangur një kërcënim të falimentimit.

“Përshkallëzimi i qëndrueshëm i tensioneve me Indinë ka të ngjarë të rëndojë në rritjen e Pakistanit dhe të pengojë konsolidimin e vazhdueshëm fiskal të qeverisë, duke penguar përparimin e Pakistanit në arritjen e stabilitetit makroekonomik”, ka thënë Moody’s.

“Një rritje e vazhdueshme e tensioneve mund të dëmtojë gjithashtu qasjen e Pakistanit në financimin e jashtëm dhe të bëjë presion mbi rezervat e tij të këmbimit valutor”, ka shtuar ai.

Rruga Press