Pak ditë pas arratisjes së bujshme, Serbia lidh marrëveshje ekstradimi me Kinën

Kina ka ratifikuar një traktat ekstradimi me Serbinë, i cili do të mundësojë ekstradimin e personave të kërkuar që gjenden në territorin e vendit tjetër, duke zgjeruar bashkëpunimin mes dy vendeve.

Megjithatë, marrëveshja ende duhet të miratohet nga parlamenti serb.

Sipas agjencisë Reuters, ekzistojnë shqetësime serioze për të drejtat e njeriut dhe rrezikun që ky traktat të përdoret për raste me prapavijë politike, transmeton Rruga Press.

Miratimi zyrtar nga organi më i lartë ligjvënës i Kinës vjen një vit pas vizitës së presidentit kinez Xi Jinping në Serbi, gjatë së cilës u nënshkruan 29 dokumente, përfshirë edhe traktatin e ekstradimit.

Presidenti serb Aleksandar Vuçiç theksoi se Kina ka qenë investitori më i madh në Serbi që prej vitit 2020 dhe se ka rritur investimet e saj 30 herë gjatë dekadës së fundit.

Një marrëveshje e nënshkruar pas një arratisjeje të bujshme

Ky zhvillim vjen menjëherë pas një incidenti që ka tërhequr vëmendjen e mediave ndërkombëtare. Dy burra – John Miller, shtetas britanik, dhe Cui Guanghai, shtetas kinez – të akuzuar nga Shtetet e Bashkuara për përpjekje për kontrabandim të teknologjisë së ndjeshme ushtarake drejt Kinës dhe për organizimin e ngacmimeve kundër një artisti kinezo-amerikan disident, arritën t’i shpëtonin arrestit shtëpiak në Serbi.

Gjykata e Lartë në Beograd ka konfirmuar se për ta është lëshuar një urdhër arresti ndërkombëtar nga Interpoli, ndërsa vendndodhja e tyre mbetet e panjohur. Rasti, i cili përfshin trafikim të mundshëm armësh dhe frikësim politik, është shtrirë nga San Francisko deri në Pekin, duke ngritur pikëpyetje mbi sigurinë ligjore në Serbi dhe ndikimin e Kinës.

Ky kontekst bën që traktati i ri i ekstradimit mes Serbisë dhe Kinës të shihet edhe më me dyshim, sidomos për mundësinë e përdorimit të tij në raste të ndjeshme politike.

Rruga Press