Oazi i perandorëve romakë, turistët mahniten me qytetin e Romës së lashtë të varrosur buzë detit

Një qytezë nënujore është kthyer në atraksionin turistik të momentit në Napoli të Italisë. Vendi daton prej shekullit të tretë dhe njihet si ‘Monte Carlo’ i Romës së lashtë, resorti ku të pasurit e të fuqishmit shkonin për të shijuar klimën e butë, verën dhe kënaqësi të tjera.

Statujat dhe rrënojat romake të një resorti 2000-vjeçar, i famshëm për luksin dhe veset, janë tashmë një atraksion turistik nënujor në Itali. Fisnikëria romake organizonte në Baiae, një vendpushim i lashtë në gjirin e Pozzuoli, afër Napolit festa të shumta. Në këtë qytezë, mozaikët datojnë nga shekulli i tretë.

“Ishte e pabesueshme,” tha arkeologu Enrico Gallochio, i cili menaxhon parkun nënujor.

“Vetëm në këtë zonë kemi gjetur 20 dhoma. Ka ende shumë për të zbuluar, por është një punë që do të marrë vite.”

Reliket e lashta romake u gjetën herë pas here gjatë shekullit të 19-të, dhe në vitet 1920 zbulimi i skulpturave prestigjioze mermeri gjatë një operacioni gërmimi në Pozzuoli ngjalli aq shumë kureshtjen e liderit fashist Benito Musolini, saqë ai sugjeroi kullimin e zonës për të parë se çfarë thesare të tjera mund të fshiheshin.

Më pas, në një ditë të kthjellët në vitet 1940, Raimondo Baucher, një pilot i forcave ajrore italiane, vuri re atë që ai e përshkroi si një “qytet fantazmë të çuditshëm” ndërsa fluturonte ulët mbi atë që dikur ishte porti Julius.

“Fotografitë e tij zbuluan një botë që deri në atë moment ishte e panjohur – vetëm vendasit dyshonin se diçka ishte atje, por ata nuk dinin se çfarë,” tha Gallochio.

Arkeologët e përshkruajnë Baiae si “Monte Carlo” të epokës së lashtë romake, një vend ku të pasurit dhe të fuqishmit shkonin për të shijuar klimën e butë, verën e ëmbël dhe për tu argëtuar. Perandorët duke përfshirë Augustus, Neron dhe Caligula kishin shtëpi në Baiae dhe disa nga rrënojat e vilës që i përkisnin Julius Cezarit janë ekspozuar në muzeun arkeologjik Campi Flegrei.

Rruga Press