Nxënësit nga Patosi fitojnë projektin e NASA-s, krijojnë veshje astronautësh me materiale të riciklueshme

Shkolla “Hekuran Maneku” në Patos ka fituar çmimin e parë në një konkurs të zhvilluar nga NASA-s për promovimin e talenteve të reja. Projekti u realizua nga nxënësit e shkollës 9 vjeçare në kuadër të projektit “Udhëtimi njerëzor në hapësirë, kuptimi i rreziqeve”.

Ky projekt është mbështetur nga dy motrat shkencëtare të njohura, Argita dhe Detina Zalli. Në një intervistë me Skype për Abc-ja e mëngjesit, drejtoresha e shkollës Marinela Beta tha se nxënësit arritën të krijonin kostume për astronautët me materiale të riciklueshme.

“Materialet janë të riciklueshme, kemi përdorur bidona plastikë 1.5 litër dhe shkumë deti. Gjithashtu dhe tuba lavamani për të krijuar lidhjen e tubit të bombolave të oksigjenit. Vetë bombolat janë të riciklueshme. Ideja ishte e nxënësve në bashkëpunim me mësuesin e artit pamor.

Ajo që na çoi në çmimin e parë ishte pikërisht veçantia e krijimit të kostumeve me materiale të riciklueshme dhe videove promovuese ku kishim improvizuar dhe një copëz hapësire”, tha Beta.

Rruga Press