Nostalgjia për kohët e mira të moçme të Mesjetës, kur sundonte kryqi ortodoks mbi Ballkan, s’po do me e lëshu kishën ortodokse të Shqipnisë

Shkruan Frashër Oseku

A ju kujtohet Edi Rama si na mbajti ligjërata, se qysh me luftu ne për Kosovën? Eh tash, sa pa kalu java, Kisha ortodokse e Shqipnisë paska çu djem e vajza prej Fierit me e pa eparhinë serbe të Rashkës e Përzerenit!!

Kjo nostalgjia për kohët e mira të moçme të Mesjetës, kur sundonte kryqi ortodoks mbi Ballkan, s’po do me e lishu kishën ortodokse të Shqipnisë. Më 2017, klerikët ortodoksë shqipfolës, Spiro Kostoli e Harallamb Terziu, banin lutje e ndiznin qira në kishën e shën Pavlit në Durrës bashkë me klerikun ekstremist serb Igor Zirojeviç, që kish në fb foto me Mlladiçin dhe tanket serbe në Kosovë. “Si një herë e një kohë”, shkruente Spirua asokohe në fb shqip e greqisht.

Tash 7 vjet ma vonë, kreu i tyne, Nikollë Hyka, mitropolit i Fierit, Patosit e Libofshës, paska nisë 20 djem e vajza fierakë për vizitë te mitropolititi (vladika) Teodosije Shibaliç, kreu i eparhisë së Rashkës e Përzerenit. Bash ai Teososije pra, që vazhdon me i dëftu kujto që e pyet se si “Kosova e Metohia iu morën Serbisë shkaku i lojnave gjeopolitike”; largkjoftë me përmendë gjenocidin serb mbi shqiptarë, a.

Ne s’pritshim tjetër nga Teodosije, se është një nga klerikët e krahut të patriarkut të ngordhun serb Irinej. Ju kujtohet, ai maniaku që ndizte qira për me u kthy ushtria serbe në Kosovë. Sa herë pat lypë ai xhihad për Kosovë, mbi njëqind?

Por pritshim pak më mirë prej Nikollë Hykës. Se Nikollë Hyka s’ësjtë se nuk di ma mirë, a. S’është i panjoftuem. As është i ri dreqi: ai ishte në Durrës më 1999, kur atje mbërrinë mbi 2o mijë refugjatët shqiptarë të dëbuen prej serbëve. Në Durrës asokohe ishte edhe spitali fushor qendror për tanë refugjatët nga Kosova.

I di ai kokërr dreqi të tana traumat e kosovarëve; e di fort mirë se çka bani botën me i shporrë serbët nga Kosova. E di, Nikollë Hyka, kështu siç e dimë ti e unë, që asnjë klerik i kishës serbe s’ka shprehë kurrë asnjë fije pendim për gjenocidin serb këtu, biles përkundrazi: e di Nikolla që ata kërkojnë përditë që me u kthy këtu Serbia, edhepse ky kthim s’bahet ndryshe veç me një gjenocid të ri!

I di tana këto, Nikollë Hyka; e tue i ditë pra të tana këto në detaj, prapë i gjuen djemtë e vajzat shqiptare në krahë të vladikës Teodosije.

Shtrohet pyetja: a ka ligj more në Shqipni që obligon edhe entet fetare? Shteti shqiptar i ka shqiptarët jashtë vendit në kushtetutë. Parlamenti shqiptar ka miratu rezoluta për Kosovën. Biles Edi Rama vjen e na mban pordhë e piskamë në Prishtinë, tue na msu neve qysh u dashka ne me ba ma shumë për vedin, a.

A ka ai ndonjë ndikim a mbikëqyrje mbi entet fetare, apo mujnë me ba bash çka të duen? A munden institucionet fetare nën epokën e tij si kryeministër me nisë rininë në krahë të ISIS-it ortodoks të Ballkanit, pa asnjë frigë prej tij a? Pse me i arrestu hoxhallarët atëhere, kur i nisin djemtë e çikat në krahët e ISIS-it musliman? Pse, ku është dallimi?

Nikollë Hyka i ka nisë 20 djem e vajza fierakë në krahë të Teodosie Shibaliçit, për me u dëftu ai eparhinë e Rashkës e Përzerenit. Tue ditë Teodosien, unë muj me përfytyru se çka u ka tregu ai fierakëve të ri. Por e di qindpërqind se çka NUK u ka kallzu. Vë bast, ta zamë, se s’u ka kallxu asgja për masakrën serbe mbi lagjen Tusus në Përzeren, ku u vranë 375 civilë duerthatë; as për masakrën e Korishës jashtë qytetit, ku vranë edhe 77 të tjerë. Vë bast që s’u ka dëftu për këto, pse klerikët e kishës së Teodosijes në Përzeren i bekonin asokohe kriminelët me vaj e me timjan. Pse s’kanë kurrë ndjesë kristiane pët atë mëkat që kanë ba, para njerëzve e para Zotit të vet. E pse ata edhe sot kërkojnë botërisht Kosovën në Serbi: edhepse kjo do t’i shtynte shqiptarët me ikë prapë deri në Durrës e në Fier.

Vë bast, po ashtu, se e di çka ka me ba Edi Rama. Asgja prej gjaje. Se ai veç pordhë të nxehta ka rreth Kosovës.

(Fotot: Fierakët në kishën serbe, dhjetor 2024; Spiro Kostoli e Harallamb Terziu me Igor Zirojeviçin më 2017; si dhe Nikollë Hyka, 2022)

Rruga Press