Norvegjia paralajmëron qytetarët që pronat e tyre mund të përdoren nga ushtria në rast lufte

Autoritetet ushtarake të Norvegjisë kanë njoftuar se mijëra qytetarë do të marrin letra informuese lidhur me përgatitjet për rekuizimin e pronave private në rast lufte, në kuadër të rritjes së gatishmërisë ushtarake dhe civile të vendit.

Sipas ushtrisë norvegjeze, letrat – të cilat pritet t’u dërgohen qytetarëve duke filluar nga e hëna – informojnë pronarët se shtëpitë, automjetet, anijet dhe makineritë e tyre mund të merren në përdorim nga forcat e armatosura në rast konflikti.

Autoritetet theksojnë se këto njoftime nuk kanë asnjë efekt praktik në kohë paqeje, përveçse shërbejnë për të paralajmëruar pronarët mbi këtë mundësi ligjore.

“Rekuizimet synojnë të sigurojnë që, në një situatë lufte, forcat e armatosura të kenë qasje në burimet e nevojshme për mbrojtjen e vendit”, thuhet në deklaratën zyrtare të ushtrisë.

Rreth 13.500 rekuizime përgatitore pritet të lëshohen për vitin 2026. Kërkesat janë të vlefshme për një periudhë njëvjeçare.

Kreu i organizatës logjistike të ushtrisë norvegjeze, Anders Jernberg, ka deklaruar se rëndësia e përgatitjes për krizë dhe luftë është rritur ndjeshëm vitet e fundit.

“Norvegjia ndodhet në situatën më serioze të sigurisë që nga Lufta e Dytë Botërore. Shoqëria jonë duhet të jetë e përgatitur për kriza të sigurisë dhe, në rastin më të keq, për luftë”, ka thënë ai.

Norvegjia, një nga vendet themeluese të NATO-s, ka forcuar ndjeshëm mbrojtjen e saj vitet e fundit.

Ky vend ndan një kufi tokësor prej 198 kilometrash dhe kufi detar me Rusinë, çka ka ndikuar në rritjen e masave të gatishmërisë ushtarake dhe civile.

Rruga Press