Njerëzit do të jenë 40% më të varfër nëse temperatura globale rritet për 4°C

Ngrohja globale do të ndikojë edhe në pasurinë e njerëzve, sipas një studimi të ri që zbulon se ngrohja për 4 gradë Celsius do ta bëjë njeriun e shtresës mesatare 40 për qind më të varfër.

Studimi i shkencëtarëve australianë sugjeron se Bruto Produkti Vendor mesatar për person në të gjithë globin do të reduktohet me 16 për qind edhe nëse ngrohja globale mbetet në 2 gradë Celsius, raportoi të martën “The Guardian”.

Shkencëtarët tani vlerësojnë se temperaturat globale do të rriten me 2.1 gradë Celius edhe nëse arrihen objektivat klimatike afatshkurtra dhe afatgjata.

Doktori Timothy Neal, i Institutit për rrezikun dhe reagimin ndaj klimës në Universitetin e Uellsit të Ri Jugor dhe autori kryesor i studimit, tha se hulumtimi i ri ka shqyrtuar ndikimin e mundshëm të ngrohjes globale në 4 gradë Celsius – e parë nga shumë ekspertë të klimës si katastrofike për planetin – me përfundimin se do ta bënte njeriun mesatar 40% më të varfër. 

Ai tha se modelet ekonomike kanë tendencë të llogarisin vetëm ndryshimin e motit në nivel lokal, por jo edhe ekstremet e motit si thatësira apo përmbytjet mund të ndikojnë në zinxhirët e furnizimit global. 

Disa ekonomistë kanë argumentuar se humbjet nga ngrohja globale mund të balancohen pjesërisht nga ngrohja që mund të përfitojnë disa rajone të ftohta, si Kanadaja, Rusia dhe Evropa veriore. Mirëpo, Neal ka theksuar se ngrohja globale do të godiste vendet kudo, sepse ekonomitë globale janë të lidhura nga tregtia.

Rruga Press