Një video, disa duartrokitje dhe një algoritëm i quajtur ‘kushtetues’ – Kuvendi shqiptar në spir(op)ale distopike
Shqipëria ka prezantuar ministren e parë të krijuar nga inteligjenca artificiale, të quajtur Diella, e cila në një mesazh drejtuar Kuvendit u përpoq të bindte deputetët se është “kushtetuese” dhe se duhej gjykuar jo nga origjina e saj, por nga funksioni. Fjalimi, i ngarkuar me retorikë të stilit propagandistik, u shoqërua me duartrokitje të mazhorancës socialiste.
Por përtej ngazëllimit zyrtar, ky moment është përshkruar si një skenë e pastër distopike. Gazetari Andi Kurti e quajti Diellën një produkt të retorikës së njohur të Elisa Spiropalit, duke ironizuar ngjashmërinë e gjuhës së përdorur. “Mreti u vuri një video dhe u tha se kjo është ministre, ndërsa socialistët duartrokisnin me pathos. Distopi,” shkruan ai, duke nënvizuar absurditetin e një realiteti ku parlamentarët trajtojnë një model gjenerativ sikur të ishte figurë politike reale.
Kjo kritikë hedh dritë mbi një dimension më të gjerë të qeverisjes shqiptare: një realitet që, sipas Kurtit, po shndërrohet gjithnjë e më shumë në një spektakël artificial, ku propaganda digjitale zë vendin e politikës reale, dhe ku deputetët duartrokasin një algoritëm ndërkohë që problemet konkrete të qytetarëve mbeten pa zgjidhje. Për shumëkënd, kjo nuk është thjesht një eksperiment teknologjik, por një pasqyrim i frikshëm i mënyrës se si pushteti po krijon një iluzion funksionaliteti, ndërsa realiteti shqiptar rrëshqet drejt një distopie të plotë.
Rruga Press