“Ne nuk mund të shkojmë askund” – gruaja ukrainase shpjegon jetën e bllokuar brenda qytetit të marrë nga trupat ruse

Kherson ishte qyteti i parë i madh ukrainas që u pushtua nga trupat ruse dhe është nënshtruar një sërë sulmesh.

Natalia Bobrysheva ka thënë për Sky News se është “bllokuar” brenda qytetit jugor, me ushqimin dhe ilaçet që po mbarojnë shpejt.

“Ishte një luftë e vërtetë për qytetin tonë, për fat të keq, rusët sulmuan dhe erdhën në qytetin tonë dhe dëmtuan infrastrukturën tonë dhe vranë njerëz të pafajshëm,” shpjegoi ajo.

“Ne jemi të bllokuar në qytet… kështu që ja ku po presim dhe kjo është jeta jonë tani”

Ajo shtoi se dje xhipa dhe makineri u rrotulluan në zonë dhe tani po dëgjojnë bomba “çdo ditë”.

Zonja Bobrysheva tha se njerëzit kanë ndarë informacione mbi sulmet në Kherson në Instagram dhe Telegram, por Rusia e ka bllokuar internetin.

“Ne kemi energji elektrike dhe ujë, por sa i përket ushqimit dhe ilaçeve nuk na mjaftojnë, çdo ditë kemi gjithnjë e më pak.”

Duke mbajtur lotët, ajo shtoi: trupat ruse “thjesht qëllojnë në makina, te njerëzit, thjesht nuk mund të shkojmë askund”.

Ajo përsëriti kërkesën e Ukrainës që NATO-ja të zbatojë një zonë ndalim-fluturimi, duke u kërkuar atyre që të “mbyllnin qiellin”.

Perëndimi ka refuzuar vazhdimisht të zbatojë një të tillë, duke thënë se do t’i vendosë ata drejtpërdrejt në luftë me Rusinë.

© Rruga Press