Në elitën e Kremlinit, të alarmuar për humbjet në rritje të luftës së Putinit në Ukrainë

Disa figura nga elita ruse kanë frikë se pushtimi i Ukrainës ishte një gabim katastrofik – por thonë se Presidenti rus nuk do të tërhiqet dhe nuk ka rrezik të humbasë pushtetin, njofton Bloomberg.

Pothuajse tetë javë pasi Vladimir Putin dërgoi trupat në Ukrainë, me humbjet ushtarake në rritje dhe Rusinë duke u përballur me izolim të paprecedentë ndërkombëtar, një numër i vogël por në rritje i figurave të larta të brendshme të Kremlinit po ngrenë pikëpyetje në heshtje për vendimin e tij për të shkuar në luftë.

Radhët e kritikëve në majat e pushtetit mbeten të kufizuara, të përhapura në poste të nivelit të lartë në qeveri dhe biznesin shtetëror. Ato besojnë se pushtimi ishte një gabim katastrofik që do ta kthejë vendin prapa për vite me radhë, sipas dhjetë njerëzve me dijeni të drejtpërdrejta mbi situatën. Të gjithë folën në kushte anonimiteti, shumë të frikësuar nga ndëshkimi në rast se flasin publikisht.

Deri më tani, këta njerëz nuk shohin asnjë shans që Presidenti rus të ndryshojë kursin dhe asnjë perspektivë për ndonjë sfidë ndaj tij në vend. Gjithnjë e më shumë i mbështetur në një rreth të ngushtë këshilltarësh të linjës së ashpër, Putini ka hedhur poshtë përpjekjet e zyrtarëve të tjerë për ta paralajmëruar atë për koston e gjymtimit ekonomik dhe politik, thanë ata.

Disa thanë se ndajnë gjithnjë e më shumë frikën e shprehur nga zyrtarët e inteligjencës amerikane se Putini mund t’i kthehet një përdorimi të kufizuar të armëve bërthamore nëse përballet me dështimin në një fushatë që ai e sheh si misionin e tij historik.

Sigurisht, vëren Bloomberg, mbështetja për luftën e Putinit mbetet e thellë në pjesën më të madhe të elitës ruse, me shumë të brendshëm që përqafojnë publikisht dhe privatisht narrativën e Kremlinit se konflikti me Perëndimin është i pashmangshëm dhe se ekonomia do t’i përshtatet sanksioneve gjithëpërfshirëse të vendosura nga SHBA-ja dhe aleatët e saj. Dhe mbështetja publike mbetet e fortë pasi tronditja fillestare dhe ndërprerja nga sanksionet i ka lënë vendin një lloj stabiliteti surreal në Rusi.

Megjithatë, gjithnjë e më shumë persona të brendshëm kanë arritur të besojnë se angazhimi i Putinit për të vazhduar pushtimin do ta dënojë Rusinë me vite të tëra izolimi dhe tensioni të shtuar që do ta lërë ekonominë e saj të gjymtuar, sigurinë e saj të rrezikuar dhe ndikimin e saj global të shkatërruar.

Disa manjatë biznesi kanë bërë deklarata të fshehta duke vënë në pikëpyetje strategjinë e Kremlinit, por shumë lojtarë të fuqishëm janë tepër të frikësuar nga zgjerimi i goditjes ndaj mospajtimit, që ta shprehin shqetësimin e tyre në publik.

Skeptikët u befasuan nga shpejtësia dhe gjerësia e përgjigjes së SHBA-së dhe e aleatëve të saj, me sanksionet që ngrinë gjysmën e rezervave të bankës qendrore prej 640 miliardë dollarësh dhe kompanitë e huaja që hoqën dorë nga investimet e dekadave për të mbyllur operacionet pothuajse brenda natës. po aq sa dhe nga zgjerimi i vazhdueshëm i mbështetjes ushtarake për Kievin që po i ndihmon forcat ukrainase të zbehin përparimin rus.

Zyrtarët e lartë janë përpjekur t’i shpjegojnë Presidentit se ndikimi ekonomik i sanksioneve do të jetë shkatërrues, duke fshirë dy dekadat e rritjes dhe standardet më të larta të jetesës që Putini kishte dhënë gjatë sundimit të tij, sipas njerëzve të njohur me situatën.

Putini i hodhi poshtë paralajmërimet, duke thënë se ndërsa Rusia do të paguante një kosto të madhe, Perëndimi nuk i kishte lënë atij alternativë veçse të bënte luftë, thanë njerëzit. Publikisht, Putin thotë se “Blitzkrieg-i ekonomik” ka dështuar dhe ekonomia do të përshtatet.

Presidenti mbetet i sigurt se publiku është pas tij, me rusët të gatshëm të durojnë vite sakrificash për vizionin e tij të madhështisë kombëtare, thanë ata.

Me ndihmën e kontrolleve të ashpra të kapitalit, rubla ka rikuperuar shumicën e humbjeve fillestare dhe ndërkohë që inflacioni është rritur, përçarja ekonomike mbetet relativisht e kufizuar deri më tani.

Putini është i vendosur të vazhdojë luftën, edhe nëse Kremlini i është dashur të zvogëlojë ambiciet e tij – nga një kontroll i shpejtë dhe gjithëpërfshirës i një pjese të madhe të vendit – në një betejë rraskapitëse për rajonin e Donbasit në lindje.

Sipas këtij këndvështrimi, kjo “më pak” do ta linte Rusinë të cenueshme, pa shpresë dhe të dobët përballë kërcënimit nga SHBA-të dhe aleatët e saj/

Rusia i kundërshton parashikimet më të vështira për ekonominë, pavarësisht nga recesioni i afërt.

Në javët që nga fillimi i pushtimit, rrethi i këshilltarëve dhe kontakteve të Putinit është ngushtuar edhe më shumë nga grupi i kufizuar i vijës së ashpër me të cilin ai konsultohej rregullisht më parë, sipas dy personave.

Vendimi për të pushtuar u mor nga Putini dhe vetëm një grusht “skifterësh”, përfshirë Ministrin e Mbrojtjes Sergei Shoigu, Shefin e Shtabit të Përgjithshëm Valery Gerasimov dhe Nikolai Patrushev, Sekretarin e Këshillit të Sigurimit të Rusisë, thanë këta njerëz.

Zëdhënësi i Kremlinit Dmitry Peskov nuk iu përgjigj menjëherë një kërkese për koment për këtë artikull.

Ministri i Jashtëm Sergei Lavrov nuk u përgjigj drejtpërdrejt pyetjeve të përsëritura nëse Rusia mund të përdorë armë bërthamore në Ukrainë në një intervistë të publikuar të martën.

Kritikët nuk shohin asnjë shenjë se Putini është ende gati të shqyrtojë ndërprerjen e pushtimit duke pasur parasysh humbjet ose të bëjë lëshimet serioze të nevojshme për të arritur një armëpushim.

Duke pasur parasysh dominimin e tij total në sistemin politik, pikëpamjet alternative janë vetëm privatisht.

Informacioni i kufizuar kontribuoi në llogaritjen e gabuar të Kremlinit në ditët e para të ofensivës, kur u vu bast për mbështetje më të gjerë midis trupave dhe zyrtarëve ukrainas, si dhe përparim më të shpejtë ushtarak, thanë njerëzit me njohuri për këtë çështje.

Po ashtu, lideri rus e nënvlerësoi edhe homologun e tij ukrainas, duke e perceptuar fillimisht si të dobët.

Rruga Press